આણંદ: વંદે ભારત એક્સપ્રેસ ટ્રેનની અડફેટે અમદાવાદની 54 વર્ષીય મહિલાનું કરૂણ મૃત્યુ

આણંદ: ગુજરાતના આણંદ રેલ્વે સ્ટેશન નજીક મંગળવારે મુંબઈ જતી સેમી હાઈ-સ્પીડ વંદે ભારત એક્સપ્રેસ ટ્રેનની અડફેટે આવી જતાં 54 વર્ષીય મહિલાનું મૃત્યુ થયું છે. આ ઘટનાની રેલવે પોલીસ દ્વારા પુષ્ટિ કરવામાં આવી છે. મૃતકની ઓળખ બીટ્રિસ આર્ચીબાલ્ડ પીટર તરીકે થઈ હતી. મહિલા રેલવે ટ્રેક ક્રોસ કરી રહ્યા હતા તે દરમિયાન અડફેટે આવી જતાં મોતને ભેટ્યા છે. આ ઘટના સાંજે 4.37 વાગ્યે બની હોવાનું અધિકારીઓ પાસેથી જાણવા મળ્યું છે.

અમદાવાદી મહિલાનું મૃત્યુ
મહિલા અમદાવાદના રહેવાસી અને દેખીતી રીતે આણંદમાં કોઈ સંબંધીને મળવા ગયા હોવાનું અધિકારીએ જણાવ્યું છે. ટ્રેન ગાંધીનગર કેપિટલ સ્ટેશનથી મુંબઈ સેન્ટ્રલ જઈ રહી હતી, અધિકારીઓ પાસેથી એ પણ જાણવા મળ્યું છે કે આ ટ્રેન આણંદ ખાતે રોકાતી નથી. હાલ વધુ તપાસ ચાલી રહી હોવાનું અધિકારીઓ જણાવ્યું હોવાથી વધુ વિગતોની રાહ જોવાઈ રહી છે.

અગાઉ પણ ટ્રેનને નડ્યા 3 અકસ્માતઉલ્લેખનીય છે કે, વડાપ્રધાન નરેન્દ્ર મોદીએ 30 સપ્ટેમ્બરે ટ્રેનને લીલી ઝંડી બતાવી હતી. છેલ્લા એક મહિનામાં ટ્રેનની અડફેટે આવીને ટ્રેક પર ઢોર મરવાના ઓછામાં ઓછા ત્રણ બનાવો બન્યા છે. જો કે, હવે એક મહિલાનું મોત થતાં રેલવેની મુસાફરી કરતા લોકોમાં પણ ક્યાંકને ક્યાંક ડરનો માહોલ હશે.