AIMIM અમદાવાદના પ્રમુખ અને એડવોકેટ શમશાદ પઠાણ પર જીવલેણ હુમલો

અમદાવાદ: અમદાવાદ AIMIMના પ્રમુખ અને એડવોકેટ શમશાદ પઠાણ પર જીવલેણ હુમલાની ઘટના સામે આવતા ચકચાર મચી ગઈ છે. પ્રાપ્ત માહિતી અનુસાર શહેરના ગુર્જરી બજારમાં તીક્ષ્ણ હથિયાર વડે હુમલો કરતા શમશાદ પઠાણ ગંભીર રીતે ઘવાયા હતા. બનાવને પગલે લોકોની ભીડ ભેગી થઈ હતી અને તેમને 108 એમ્બ્યુલન્સ મારફતે તાત્કાલિક સારવાર માટે વીએસ હોસ્પિટલ ખસેડવામાં આવ્યા હતા.

ઓલ ઈન્ડિયા મજલિસ-એ-ઈત્તેહાદુલ મુસલમીન (AIMIM) અમદાવાદના પ્રમુખ શમશાદ પઠાણ પર રવિવારે જમાલપુર ગુર્જરી બજારમાં અસામાજીક તત્વો દ્વારા જીવલેણ હુમલો કરવામાં આવ્યો હતો. ચપ્પાના ઘા મારતા તેમને ગંભીર ઈજાઓ થઈ હતી. પોલીસ દ્વારા આરોપીઓ સામે ફરિયાદ દાખલ કરી આગળની કાર્યવાહી હાથ ધરવામાં આવી છે.

અસામાજીક તત્વો દ્વારા જીવલેણ હુમલો કરવામાં આવ્યો હતો. આ હુમલામાં શમશાદ પઠાણને પાછળના ભાગમાં તીક્ષ્ણ હથિયારનો ઘા વાગતા લોહીલુહાણ થયા હતા. આ બનાવને પગલે લોકોની ભીડ ભેગી થઈ હતી. ગંભીર હાલતમાં પઠાણને તાત્કાલિક સારવાર માટે વીએસ હોસ્પિટલ ખસેડવામાં આવ્યા હતા. જ્યાં ડોક્ટરો દ્વારા તેમની સારવાર કરવામાં આવી રહી છે.

ઉલ્લેખનીય છે કે, શમશાદ પઠાણને શનિવારે જનરલ સેક્રેટરીમાંથી ઉપપ્રમુખ પદ પર બઢતી આપવામાં આવી હતી. જેથી તેઓએ AIMIM ગુજરાત રાજ્ય પ્રમુખ સાબીર કાબલીવાલાને આભાર માનતા ટ્વીટ પણ કર્યું હતું. હાલ પોલીસ દ્વારા તપાસ કરવામાં આવી રહી છે. જો કે, હુમલાવરો કોણ છે તે અંગે હજી સુધી કોઈ માહિતી સામે આવી નથી. સમગ્ર મામલે વધુ વિગતોની રાહ જોવાઈ રહી છે.