અમદાવાદઃ AMCની ગંભીર બેદરકારી, ખોદકામ સમયે અદાણી ગેસની પાઈપલાઈન તૂટી

I am Gujarat

AMCની ગંભીર બેદરકારી

અમદાવાદઃ શહેરના મકરબા, વેજલપુર, સરખેજ અને જુહાપુરા વિસ્તારની ગૃહિણીઓ માટે શુક્રવારની સવાર મુશ્કેલભરી બની હતી. કારણ કે અદાણીની ગેસની પાઈપલાઈનમાંથી ગેસ લિકેજની સમસ્યાના કારણે તેમને સવારની એક કપ ચા પણ નસીબ નહોતી થઈ. આ પાછળનું કારણ અમદાવાદ મ્યુનિસિપલ કોર્પોરેશન દ્વારા વેજલપુર નજીક શ્રીનંદનગરમાં મેઈન્ટેનન્સ કામ દરમિયાન અદાણીની ગેસ પાઈપલાઈન તૂટી ગઈ હતી. હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

ખોદકામ કરતા તૂટી ગેસની પાઈપ લાઈન

અદાણીના કસ્ટમર કેર નંબર સાથે વાત કર્યા બાદ ગેસ ન આવતો હોવાનું કારણ ગ્રાહકો સવારમાં જ સમજી ગયા હતા. AMCના અધિકારીએ જણાવ્યું કે, ખોદકામ માટે જેસીબી મશીન કામ કરી રહ્યું હતું, ત્યારે તે અદાણીની પાઈપલાઈનને અડી ગયું જેથી ગેસ લીક થયો. કોન્ટ્રાક્ટરે અદાણીને રિપેરિંગ માટેનો ખર્ચ ચૂકવવાનો રહેશે, અને તેને ભવિષ્યમાં વધારે સાવધાન રહેવા માટે કહી દેવાયું છે.

મોટી દુર્ઘટના થતા ટળી

અદાણી ગેસના પ્રવક્તાએ જણાવ્યું કે, વેજલપુરમાં PNG નેટવર્કમાં અદાણી ગેસની પાઈનલાઈનમાં ભંગાણ થયું હોવાની માહિતી શુક્રવારે સવારે મળી હતી. એએમસી દ્વારા ચાલી રહેલા ખોદકામ દરમિયાન આવું બન્યું હતું. તાત્કાલિક રિપેરિંગનું કામ શરૂ કરી દેવામાં આવ્યું અને સાંજે 5 વાગ્યા સુધીમાં સપ્લાય શરૂ થઈ ગઈ હતી. આ ઘટનાથી કેટલાક ગ્રાહકોને મુશ્કેલ થઈ હતી. મકરબા રોડના રહેવાસી ધરતી પરીખ જણાવે છે, ચોમાસાની શરૂઆત પહેલા જ એએમસી દ્વારા ખોદકામ વખતે થયેલી બેદરકારી ખુબ જ પરેશાન કરનારી છે. આ ઘટનાથી સ્પષ્ટ થાય છે કે એએમસી દ્વારા સુરક્ષાના ભાગ રૂપે કોઈપણ પગલાં લેવામાં આવતા નથી અને આ કારણે કોઈ મોટી દુર્ધટના સર્જાઈ હોત.

લોકોએ બહારથી ફૂડ ઓર્ડર કરવું પડ્યું

સરખેજના રહેવાસી અલી અબ્બાસ મરચાવાલા કહે છે, હાલમાં રમઝાન મહિનો ચાલતો હોવાથી અમે આખો દિવસ ઉપવાસ કરીએ છીએ. ઉનાળા દરમિયાન ફૂડ કે પાણી વિના આખો દિવસ રહેવું મુશ્કેલ હોવાથી અમે સામાન્ય રીતે સવારે જ રાંધીએ છીએ. પરંતુ ગેસ ન હોવાના કારણે અમારે બહારથી ઈફ્તારી ઓર્ડર કરવી પડી.