AMCએ અમદાવાદના તમામ ઝોનમાં ફ્રી કોરોના ટેસ્ટિંગ શરૂ કર્યું, શું છે સ્થળ અને સમય?

અમદાવાદ શહેર ગુજરાત રાજ્યમાં કોરોનાથી સૌથી વધુ પ્રભાવિત શહેરોમાંથી એક છે. શરૂઆતના તબક્કામાં રોજના 400 સુધીના કેસો શહેરમાં નોંધાતા હતા. જોકે હાલમાં નવા કેસોની સંખ્યા થોડી ઓછી થઈ હતી પરંતુ ફરીથી કેસોમાં ઉછાળો જોવા મળી રહ્યો છે. ત્યારે AMC ફરી હરકતમાં આવી ગયું છે. અમદાવાદ મ્યુનિસિપલ કોર્પોરેશને શહેરીજનો માટે દરેક ઝોન્સમાં ફ્રી કોરોના ટેસ્ટિંગની સુવિધા શરૂ કરી છે.

કોવિડ-19થી સંક્રમિત દરેક વ્યક્તિની શોધીને તેને શક્ય તેટલી ઝડપી સારવાર આપીને સંક્રમણ આગળ ફેલાતું રોકવા માટે શહેરના દક્ષિણ પશ્ચિમ ઝોન, ઉત્તર ઝોન, મધ્ય ઝોન, ઉત્તર પશ્ચિમ ઝોન, પૂર્વ ઝોન, દક્ષિણ ઝોન અને પશ્ચિમ ઝોનમાં ટેસ્ટિંગ સેન્ટર શરૂ કર્યા છે. આ ટેસ્ટિંગ માટેનો સમય 9થી 7 વાગ્યાની વચ્ચે દરેક ઝોનમાં જુદો જુદો રાખવામાં આવ્યો છે.

AMCએ પોતાના ફેસબુક પેજ પર આ અંગેની માહિતી આપી હતી. સાથે જ શહેરીજનોને પોતાના નજીકના કોરોના ટેસ્ટિંગ સેન્ટર પર જઈને ઝડપથી ટેસ્ટ કરાવવા અપીલ પણ કરી છે. ત્યારે આશા છે કે AMCના આ નિર્ણયથી લોકો મોટી સંખ્યામાં પોતાનો કોરોના ટેસ્ટ કરાવશે અને વધી રહેલા કોરોનાના સંક્રમણ પર કન્ટ્રોલ લાવવામાં મદદ મળશે. ઉલ્લેખનીય છે કે અમદાવાદ શહેરમાં શનિવારે 152 નવા કેસ નોંધાયા હતા અને 3 વ્યક્તિઓના મોત થયા હતા. જ્યારે ગુજરાતની વાત કરીએ શનિવારે રેકોર્ડબ્રેક 1432 નવા કેસ નોંધાયા હતા.

ગુજરાત રાજ્યમાં અત્યાર સુધી કોરોનાના કુલ 1,21,930 કેસો સામે આવી ચૂક્યા છે. જ્યારે રિકવરી રેટ 84.12 ટકા થયો છે. હાલમાં રાજ્યમાં 16,054 એક્ટિવ કેસ છે અને 1,02,571 જેટલા વ્યક્તિઓ કોરોનાથી સ્વસ્થ થઈને ઘરે ગયા છે. ટેસ્ટિંગની વાત કરવામાં આવે તો શનિવારે 24 કલાકમાં રાજ્યમાં 61,432 ટેસ્ટ કરવામાં આવ્યા હતા. રાજ્યની વસ્તીને ધ્યાનમાં લેતા દસ લાખની વસ્તી સામે પ્રતિ દિવસે 945.11 ટેસ્ટ થાય છે. જ્યારે ગુજરાતનો કુલ મૃત્યુઆંક 3305 થયો છે.