અમૂલે દૂધના ભાવમાં પ્રતિ લીટર 2 રૂપિયાનો વધારો કર્યો, નવો ભાવ 17મી ઓગસ્ટથી લાગુ પડશે

અમદાવાદઃ ભાવ વધારાનો માર ફરી એકવાર સામાન્ય માણસે સહન કરવો પડશે. દૂધ અને દૂધની બનાવટ પર GST લાગુ થતા અમુલે દહીં, છાસ અને લસ્સી જેવી પ્રોડક્ટ્સ પર ભાવ વધારો કર્યો હતો. પરંતુ હવે દૂધના ભાવમાં વર્ષનો બીજો વધારો કરવામાં આવ્યો છે. દૂધના ભાવમાં એક લીટરે 2 રૂપિયાનો વધારો કરવામાં આવ્યો છે. આ ભાવ વધારો આવતીકાલથી લાગુ પડી જશે. સમગ્ર ગુજરાત સહિત દિલ્હી એનસીઆર, મુંબઈ, પશ્ચિમ બંગાળ અને અન્ય તમામ બજારોમાં પેટ્રોલ, ડીઝલ અને ગેસ સહિતના ભાવમાં વધારો થઈ રહ્યો છે ત્યારે ફરી એકવાર દૂધના ભાવમાં કરાયેલો વધારો સામાન્ય માણસની કમર તોડી નાખનારો સાબિત થઈ રહ્યો છે.ટૂંક જ સમયમાં ફરી એકવાર દૂધના ભાવમાં વધારો કરતા રસોડાનું બજેટ ખોરવાઈ શકે છે. અમૂલે દૂધના ભાવમાં પ્રતિ લીટર 2 રૂપિયાનો વધારો કર્યો છે. ગુજરાત સહિત તમામ જગ્યાએ દૂધના નવા ભાવ લાગુ થઈ જશે. આ ભાવ વધારો કરવા પાછળનું અમૂલે કારણ પણ જણાવ્યું છે. આ ભાવ વધારા પાછળનું કારણ ઓપરેશન ખર્ચ અને દૂધના ઉત્પાદન ખર્ચમાં થયેલા વધારાના કારણે કરવામાં આવ્યો છે.

કાલથી આ ભાવે અમૂલ દૂધના પાઉચ ખરીદવા પડશે
એટલે કે જે અમૂલ ગોલ્ડ દૂધનું પાઉચ 30 રૂપિયા 500ml આવતું હતું તેના માટે હવે 31 રૂપિયા ચૂકવવા પડશે. અમૂલ તાજાનો ભાવ 25 રૂપિયા પ્રતિ 500ml કરી દેવામાં આવ્યો છે. આ સિવાય અમૂલ શક્તિના 500ml પાઉચ માટે 28 રૂપિયા ચૂકવવા પડશે. આમ દૂધના ભાવમાં પ્રતિ લીટર બે રૂપિયાનો ભાવ વધારવામાં આવ્યો છે.

ભાવ વધારા પાછળનું આ છે કારણ
આ સાથે અમૂલે જણાવ્યું છે કે પાછળા વર્ષની સરખામણીમાં પશુઓનો ખોરાક અંદાજીત 20% જેટલો વધારો થયો હોવાનું પણ કારણ ભાવ વધારા પાછળ રજૂ કર્યું છે. અમૂલ ફેડરેશનના સંલગ્ન દૂધ સંઘો દ્વારા ખેડૂતોના દૂધ ઉત્પાદન ભાવમાં પાછલા વર્ષની સરખામણીમાં 8થી 9% જેટલો વધારો પણ કરવામાં આવ્યો છે.

ભાવ વધારાથી દૂધ ઉત્પાદકોને લાભ થશે?ભાવ વધારા સાથે અમૂલે જણાવ્યું છે કે, તે પોતાની નીતિના ભાગ રૂપે ગ્રાહકો દ્વારા દૂધ અને દૂધની બનાવટો માટે ચૂકવવામાં આવેલા રૂપિયામાંથી 80 પૈસા દૂધ ઉત્પાદકોને ચૂકવે છે. આમ આ ભાવ વધારાનો ફાયદો દૂધ ઉત્પાદકોને સહાય થશે અને તેમને દૂધ ઉત્પાદન કરવામાં પ્રોત્સાહિત કરવામાં આવશે.