અમદાવાદના વાતાવરણમાં અચાનક પલટો, સાંજના સમયે ઘણાં વિસ્તારોમાં વરસાદી ઝાપટા

અમદાવાદ: અમદાવાદમાં આજે સાંજે અચાનક વરસાદ શરૂ થઈ જતા વાતાવરણમાં ઠંડક પ્રસરી ગઈ હતી. અમદાવાદમાં પશ્ચિમના કેટલાંક વિસ્તારો જેવા કે નારણપુરા, ઉસ્માનપુરા સહિત આશ્રમરોડના કેટલાંક ભાગોમાં ધોધમાર વરસાદનું ઝાપટું પડ્યું હતું. ત્યારબાદ અમદાવાદના પૂર્વ વિસ્તારમાં પણ વરસાદ શરૂ થયો છે. સાંજે અમદાવાદમાં કેટલાંક વિસ્તારોમાં વરસાદી ઝાપટું પડીને બંધ થઈ ગયું હતું જ્યારે અન્ય કેટલાંક વિસ્તારોમાં થોડી વાર પછી વરસાદ શરૂ થયો હોવાનું જાણવા મળી રહ્યું છે.

અમદાવાદના વાતાવરણમાં આજે સાંજે અચાનક જ પલટો જોવા મળ્યો છે. બપોર બાદથી જ શહેરમાં એકદમ વાદળછાયું વાતાવરણ સર્જાયું હતું. ત્યારે શહેરના કેટલાંક વિસ્તારોમાં વરસાદી છાંટા પડ્યા છે. શહેરના કેટલાંક વિસ્તારોમાં પવન સાથે વરસાદ પડ્યો છે. અમદાવાદ શહેરના પશ્ચિમના વિસ્તારો જેવા કે ગોતા, સોલા અને ઘાટલોડિયામાં વરસાદ પડ્યો છે. આ સિવાય ચાંદલોડિયા અને વિજય ચાર રસ્તા, નારણપુરામાં પણ વરસાદ પડ્યો છે. નરોડામાં થોડીવારમાં જ વરસાદ બંધ થઈ ગયો હતો જ્યારે પૂર્વમાં વસ્ત્રાલમાં પણ વરસાદ પડ્યો છે.

સાંજે થોડા સમય માટે અમદાવાદ શહેરના મોટાભાગના વિસ્તારોમાં મેઘરાજાએ એન્ટ્રી કરી હતી. શહેરના પશ્ચિમ અને પૂર્વ વિસ્તારોમાં પણ મેઘરાજા મન મૂકીને વરસ્યા હતા. આજે અમદાવાદમાં અચાનક વાતાવરણમાં પલટો આવતા લોકો આશ્ચર્યમાં મૂકાઈ ગયા છે. જ્યાં એકબાજુ ચોમાસું વિદાઈ લઇ રહ્યું છે ત્યાં અચાનક ફરી વખત મેઘરાજાએ શહેરમાં એન્ટ્રી કરતા લોકો ખુશ થઈ ગયા હતા.