'હાર્દિક સાથે ના રહો, એક દિવસ તમારે પણ...'

નવગુજરાતસમય.કોમ

પાસના એક પછી એક અગ્રણીઓ હાર્દિક પટેલનો સાથ છોડી રહ્યા છે ત્યારે, હવે એસપીજીના પ્રવક્તા ચિરાગ પટેલ તેમજ પાસના પ્રવક્તા રેશમા પટેલ વચ્ચે થયેલી ટેલિફોનિક વાતચીતની એક ઓડિયો ક્લિપ વાયરલ થઈ છે. આ ઓડિયો ક્લિપમાં રેશમા પટેલ પોતાના પર લગાવાઈ રહેલા આક્ષેપના પુરાવા માગી રહ્યાં છે, જેના જવાબમાં ચિરાગ તેમને સમય આવ્યે પુરાવા જાહેર કરીશ તેવું કહી રહ્યો છે.

આ ક્લિપમાં ચિરાગ પટેલ રેશમા પટેલને એવું કહેતા પણ સાંભળી શકાય છે કે, મારે તમારી સાથે કોઈ અંગત દુશ્મની નથી. મારી પાસે જે વિગતો છે તેમાં બધું જાહેર કરવા જેવું નથી, અને હું સમય આવ્યે પુરાવા જાહેર કરીશ. જેના જવાબમાં રેશમા પટેલ કહે છે કે, હું તમને ઓપનલી કહું છું કે, તમારી પાસે જે પુરાવા છે તે જાહેર કરી દો. તેના જવાબમાં ચિરાગ પટેલ કહે છે કે, ‘મારે તમારી સાથે કોઈ દુશ્મની નથી, પરંતુ તમે બીજા રસ્તે જઈ રહ્યા છો તેનું મને દુ:ખ છે, તમને તે (હાર્દિક) ખોટા રસ્તે લઈ જઈ રહ્યો છે.. તમે તેની સાથે ન રહો. કેતન, ચિરાગ, નિખિલે જે રીતે પાસમાંથી નીકળ્યા, તેમ ક્યારેક તમારો પણ વારો આવશે.’

પોતાના પર લગાવાયેલા આક્ષેપ અંગે રેશ્મા પટેલે જણાવ્યું હતું કે, કોઈ આધાર વિના લગાવાયેલા આ આરોપ માત્રને માત્ર આંદોલનકારીઓને સમાજમાં નીચું બતાવવા અને આંદોલનને તોડવાના હેતુ સાથે જ થઈ રહ્યા છે. તો બીજી તરફ, ચિરાગ પટેલે દાવો કર્યો હતો કે તેણે રેશ્મા પટેલના 21 દિવસના ઉપવાસ તેમજ પોતે જે કંઈ પણ આક્ષેપ કર્યા છે તે બધાના તેની પાસે પુરાવા છે.