ગુજરાતનું ગર્વ: પેરા-બેડમિન્ટન ચેમ્પિયન માનસી જોશી પરથી તૈયાર થઈ બાર્બી ડૉલ

અમદાવાદ: વર્લ્ડ પેરા-બેડમિન્ટન ચેમ્પિયન માનસી જોશી પાસે પોતાની બાર્બી ડૉલ છે. મતલબ કે, કંપનીએ માનસી જોશીની હૂબહૂ બાર્બી ડૉલ તૈયાર કરી છે. રવિવારે ઈન્ટરનેશનલ ગર્લ ચાઈલ્ડ ડેના દિવસે માનસી જોશી 'બાર્બી શિરોઝ' (Barbie Sheroes)ના ક્લબમાં સામેલ થઈ છે. આ યાદીમાં સામેલ થનારી મહિલાઓ પાસે પોતાની પ્રતિકૃતિ જેવી બાર્બી ડૉલ છે.

માનસી જોશી બીજા ભારતીય મહિલા અને પ્રથમ પેરા-એથ્લેટ છે, જેમના પરથી બાર્બી ડૉલનું મોડલ તૈયાર કરાયું છે. માનસી જોશી સિવાય બીજા ભારતીય મહિલા છે જિમનાસ્ટ દીપા કર્માકર, જેમના પરથી 2019માં બાર્બીનું મોડલ તૈયાર કરાયું હતું. માનસી જોશીને તેમના જેવું દેખાતું વન-ઓફ-અ-કાઈન્ડ (OOAK) બાર્બી મોડલ મળ્યું છે.

માનસી જોશીએ આ અંગે ખુશી વ્યક્ત કરતાં અમારા સહયોગી અખબાર ટાઈમ્સ ઓફ ઈન્ડિયાને કહ્યું, "બાર્બી દ્વારા આ સન્માન પ્રાપ્ત થતાં ગર્વની લાગણી અનુભવું છું. આ પ્રકારના સન્માન દ્વારા મને વિશ્વાસ છે કે દિવ્યાંગતા પ્રત્યે લોકોનો દ્રષ્ટિકોણ બદલવામાં મદદ મળશે." બાર્બીની ટેગલાઈન 'યુ કેન બી એનીથિંગ' (તમે કંઈપણ બની શકો છો) વિશે વાત કરતાં માનસીએ કહ્યું, "હા, આ ટેગલાઈન મારા પર વ્યાપક રીતે લાગુ પડે છે. પરિસ્થિતિઓને ફાયદામાં પરિવર્તિત કરવાની આ વાત છે."


2011માં અકસ્માત થયો એ પહેલાથી જ માનસી સ્પોર્ટ્સમાં સક્રિય હતા. અકસ્માતના કારણે તેમનો ડાબો પગ કાપવો પડ્યો હતો. પોતાની આ ખામીને માનસી જોશીએ હાવિ ના થવા દીધી અને 8 વર્ષ બાદ 2019માં સ્વિત્ઝર્લેન્ડના બેસલ (Basel) ખાતે વર્લ્ડ ચેમ્પિયનશીપમાં તેમણે પેરા-બેડમિન્ટન ચેમ્પિયનનો ખિતાબ જીત્યો હતો.

ડૉલ વિશે વાત કરતાં માનસીએ કહ્યું, "પોનીટેલની સાથે બાર્બી ડૉલ હૂબહૂ મારા જેવી છે. ડૉલ ખૂબ જ સુંદર છે, પ્રોસ્થેસિસ સાથે સંપૂર્ણ છે અને તેના હાથમાં બેડમિન્ટન રેકેટ પણ છે. આ ડૉલ અનોખી છે અને હું હંમેશા તેને મારી સાથે રાખીશ."

Mattel ટોયઝ ઈન્ડિયા પ્રાઈવેટ લિમિટેડના માર્કેટિંગ અને ફ્રેન્ચાઈઝીના હેડ લોકેશ કટારિયાએ કહ્યું, "અમે માનીએ છે કે દરેક યુવતીને તેના સપના પૂરાં કરવાની શક્તિ મળવી જોઈએ અને આ પ્રકારના રોલ મોડલ્સ યુવતીઓને આત્મવિશ્વાસ રાખવા માટે પ્રેરણા પૂરી પાડી શકે છે. તે કંઈપણ બની શકે છે તે કલ્પવું શરૂઆત છે. આ જોઈને જ તે કંઈક અલગ કરી શકે છે."

Frida Kahlo (ફાઈન આર્ટ્સ), નાઓમી ઓસાકા (ટેનિસ પ્લેયર), પેટી જેન્કીસ (ફિલ્મમેકર), Nicola Adams Obe (બોક્સિંગ ચેમ્પિયન), Ibthihaj Muhammad (ફેન્સિંગ ચેમ્પિયન), બિન્દી ઈર્વિન (કન્ઝર્વેશનિસ્ટ), મેડિસન ડે રોઝારિઓ (વ્હીલચેર રેસિંગ ચેમ્પિયન) અને Sumeyye Boyaci (પેરા-સ્વિમિંગ ચેમ્પિયન) સહિતની પોતપોતાના ક્ષેત્રમાં કાઠું કાઢનારી મહિલાઓ સાથે માનસી જોશીનું નામ જોડાયું છે. આ તમામની ઓળખ સમાન બાર્બી ડૉલ તૈયાર કરવામાં આવી છે.