પૂરી થઈ રહી છે ડેડલાઈન, હેલ્મેટ કે PUC નહીં હોય તો શુક્રવારથી મેમો ફાટશે?

અમદાવાદ: ટ્રાફિકના નવા નિયમો અમલ આવ્યા બાદ ગુજરાત સરકારે આપેલી રાહત 01 નવેમ્બરના રોજ પૂરી થઈ રહી છે. નવા નિયમોનો ગુજરાતમાં પણ અમલ શરુ થયા બાદ રાજ્યમાં ખાસ્સો ઉહાપોહ મચ્યો હતો. લોકોએ હેલ્મેટના કાળા બજાર થઈ રહ્યા હોવાની અને પીયુસી માટે કલાકો સુધી લાઈનમાં ઉભું રહેવું પડતું હોવાની ફરિયાદ કરતાં સરકારે તેમાં રાહત આપી હતી. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો જનાક્રોશને જોતા વાહનવ્યવહાર મંત્રી આર.સી. ફળદુએ 31મી ઓક્ટોબર સુધી જે વાહનચાલકે હેલ્મેટ ન પહેર્યું હોય કે પછી પીયુસી ન હોય તો તેને દંડ નહીં ભરવો પડે તેવી જાહેરાત કરી હતી. જેના કારણે લોકોએ રાહતનો શ્વાસ લીધો હતો, અને પીયુસી કઢાવવા માટે જોવા મળી રહેલી લાંબી-લાંબી લાઈનો અચાનક ગાયબ થઈ ગઈ હતી. હેલ્મેટ ખરીદવા દોડધામ કરી રહેલા લોકોએ પણ સરકારે જાહેરાત કરતાં જ હેલ્મેટ ખરીદવાનું પણ માંડી વાળ્યું હતું. જોકે, દિવાળીની રજાઓ બાદ હવે ઓક્ટોબર મહિનો પૂરો થતાં જ 1 નવેમ્બર 2019થી એટલે કે આ શુક્રવારથી જ નવા નિયમોનો અમલ ફરી શરુ થવા જઈ રહ્યો છે. શુક્રવારથી જો હેલ્મેટ વિના વાહન ચલાવતા કોઈ પકડાશે તો તેની પાસેથી પહેલીવાર 500 રુપિયા અને પછી 1000 રુપિયા દંડ લેવામાં આવશે જ્યારે પીયુસી ન હોય તો પહેલીવાર 1000 રુપિયા અને ત્યારબાદ 2,000 રુપિયાનો દંડ ભરવો પડશે. પીયુસી અને હેલ્મેટ ઉપરાંત હવે દરેક વાહનમાં ફરજિયાત એચએસઆરપી નખાવવાની મુદ્દત પણ 31મી ઓક્ટોબરે પૂરી થઈ રહી છે. તેવામાં જો તમારા વાહનમાં HSRP નહીં હોય તો પણ તમારે દંડ ભરવો પડી શકે છે. આ ડેડલાાઈનમાં સરકારે વધારો કરવાની હજુ સુધી કોઈ જાહેરાત નથી કરી. સરકારે જાહેરાત કરી હતી કે લોકોને પીયુસી કઢાવવા માટે હાલાકી ન ભોગવવી પડે તે માટે વધારાનના પીયુસી સેન્ટર્સને પરવાનગી આપવામાં આવશે. જોકે, પીયુસી સેન્ટર્સની સંખ્યામાં ખાસ વધારો નથી થયો અને હવે 01 નવેમ્બરને માંડ એક દિવસ વચ્ચે રહ્યો છે ત્યારે પીયુસી માટે લોકો ફરી દોડધામ શરુ કરે તેવી શક્યતા છે.