કોંગ્રેસના ભરતસિંહ સોલંકીને કોરોના થયા બાદ શરીર એટલું ઉતર્યું કે ઓળખવા મુશ્કેલ

અમદાવાદ: ભૂતપૂર્વ કેન્દ્રીય પ્રધાન અને કોંગ્રેસના વરિષ્ઠ નેતા ભરતસિંહ સોલંકી છેલ્લા 55 દિવસથી કોરોના સામે જંગ લડી રહ્યા છે. આટલા દિવસોમાં ભરતસિંહનું સોલકીનું શરીર એટલી હદે ઉતરી ગયું છે કે તેમને ઓળખવામાં પણ મુશ્કેલી પડી રહી છે. ભરતસિંહની પહેલાની અને હાલની તસવીરમાં ઘણો ફરક આવી ગયો છે. જણાવી દઈકે, 23મી જૂને વડોદરાની એક ખાનગી હોસ્પિટલમાં સોલંકીનો કોરોનાનો રિપોર્ટ પોઝિટિવ હોવાનું જાણવા મળ્યું હતું.

ભરતસિંહ સોલંકીનો કોરોનાનો રિપોર્ટ નેગેટિવ આવ્યો હોવાનું સૂત્રોએ જણાવ્યું છે. પરંતુ કોમ્પ્લિકેશન હોવાને કારણે તેઓ હજી હોસ્પિટલમાં દાખલ છે. રવિવારે સોશ્યલ મીડિયા પર તેમની એક તસવીર વાયરલ થઈ હતી જેમાં સોલંકી તેમની ટ્રેડમાર્ક મૂછો વિના હોસ્પિટલમાં બેડ પર જોવા મળ્યા હતા. GPCCના પ્રમુખ અમિત ચાવડાએ અમારા સહયોગી અખબાર ટાઈમ્સ ઓફ ઈન્ડિયા સાથે આ તસવીર શેર કરી હતી.
23મી જૂને ભરતસિંહ સોલંકીનો કોરોનાનો રિપોર્ટ પોઝિટિવ આવ્યા બાદ તેમને પહેલા વડોદરાની હોસ્પિટલમાં દાખલ કરવામાં આવ્યા હતા. જોકે, બાદમાં વધુ સારવાર માટે અમદાવાદની ખાનગી હોસ્પિટલ ખસેડવામાં આવ્યા હતા. ત્યારબાદ શ્વાસ લેવામાં તકલીફ થતાં તેઓને વેન્ટિલેટર પર રાખવામાં આવ્યા હતા. તે સમયે ભરતસિંહની તબિયત વધુ લથડતા ખાનગી હોસ્પિટલના ડોક્ટરોએ AIIMS અને મુંબઈની લીલાવતી હોસ્પિટલના ટોચના ડૉક્ટરોની પણ સલાહ લીઘી હતી. હાલની પરિસ્થિતિએ તેમની તબિયત સુધારા પર છે, પરંતુ શરીર એટલું ઉતરી ગયું છે કે, તેમનો હાલનો ફોટો જોતા તેમને ઓળખવા મુશ્કેલ છે.