ગુજરાતને મળશે નવા DGP, આશિષ ભાટિયા સૌથી પ્રબળ દાવેદાર

કપિલ દવે, ગાંધીનગરઃ અમદાવાદ શહેર પોલીસ કમિશનર આશિષ ભાટિયા ગુજરાતના નવા DGP બની શકે છે. મુખ્યમંત્રી વિજય રૂપાણીએ મુખ્ય સચિવ અનિલ મુકીમને શુક્રવારે UPSC સમિતિ સમક્ષ રાજ્ય સરકારની પસંદગી તરીકે ભાટિયાનું નામ આપવાનો આદેશ આપ્યો છે. શિવાનંદ ઝાની ટર્મ 31 જુલાઈએ સમાપ્ત થઈ રહી હોવાથી મુખ્ય સચિવ દિલ્હીમાં UPSC અને ગૃહ મંત્રાલયના અધિકારીઓને મળીને ગુજરાતના આગામી ડિરેક્ટર જનરલ ઓફ પોલીસ (DGP)નું નામ નક્કી કરશે.

સરકારના મુખ્ય સૂત્રોના જણાવ્યા પ્રમાણે, મુખ્યમંત્રી વિજય રૂપાણીએ રાજ્યના ગૃહમંત્રી પ્રદીપસિંહ જાડેજા, મુખ્ય સચિવ અનિલ મુકીમ અને CMOના મુખ્ય અગ્રસચિવ કે. કૈલાસનાથન સાથે આ અંગે વિગતવાર ચર્ચા કરી હતી. 'UPSC અને ગૃહ મંત્રાલયના અધિકારીઓ સાથે વાતચીત કર્યા બાદ વડાપ્રધાનની મંજૂરી માટે ભાટિયાનું નામ મોકલવામાં આવશે. જો વડાપ્રધાન અન્ય કોઈ નામ નહીં સૂચવે તો રાજ્ય સરકાર દ્વારા ભાટિયાને DGP બનાવવામાં આવશે', તેમ સૂત્રોએ જણાવ્યું હતું.

ટોચના સૂત્રોના જણાવ્યા પ્રમાણે, મુકીમ અને ઝા શુક્રવારે (આજે) બપોરે ગાંધીનગર પરત આવશે અને સાંજે 4 વાગ્યા બાદ ઝા આગામી ડીજીપીને ચાર્જ સોંપશે.

રાજ્ય સરકારે ડીજીપીના હોદ્દા માટે 6 અધિકારીઓના નામનો પ્રસ્તાવ મૂક્યો હતો. છ અધિકારીઓની પેનલમાં ન્યૂ દિલ્હીના ડિરેક્ટર જનરલ બ્યૂરો ઓફ સિવિલ એવિએશન રાકેશ અસ્થાના, ન્યૂ દિલ્હીના નેશનલ સિક્યુરિટી ગાર્ડ (NSG)ના ડિરેક્ટર જનરલ એ.કે.સિંહ, અમદાવાદના પોલીસ કમિશનર આશિષ ભાટિયા, ડિરેક્ટર જનરલ એન્ડ હોમ ગાર્ડ્સ ટી.એસ. બિષ્ટ, એન્ટી-કરપ્શન બ્યૂરોના સ્પેશિયલ ડિરેક્ટર કેશવ કુમાર, પોલીસ રિફોર્મ્સના ડીજીપી વિનોદ મલનો સમાવેશ થાય છે.

આશિષ ભાટિયાએ છેલ્લા 20 વર્ષમાં ગુજરાત પોલીસમાં અલગ-અલગ મહત્વપૂર્ણ પદ પર કામ કર્યું છે. ભાટિયા 2002માં ગુજરાતમાં થયેલા રમખાણોના નવ કેસની તપાસ કરવા માટે સુપ્રીમ કોર્ટે નિયુક્ત કરેલી SITની ટીમના ત્રણ આઈપીએસ અધિકારીઓમાંથી એક હતા.