લો બોલો! AMCના કર્મચારીઓની હાજરી પૂરવા માટે મૂકવામાં આવેલા બાયોમેટ્રિક મશીનો જ ગાયબ

અમદાવાદ- લગભગ 3 વર્ષ પહેલા સરકારી કચેરીઓના પ્રવેશદ્વાર પર અથવા તો ઈમારતની લિફ્ટ પાસે સેંકડોની સંખ્યામાં બાયોમેટ્રિક સિસ્ટમ મૂકવામાં આવી હતી. કર્મચારીઓ સમયસર ઓફિસમાં આવે, બહાના ના કાઢે અને તેમની અવર જવર રેકોર્ડ થાય તે માટે નિર્ણય લેવામાં આવ્યો હતો. કર્મચારીની હાજરી નોંધતા પહેલા મશિન દ્વારા તેમના રેટિના અને ફિંગર-પ્રિન્ટને સ્કેન કરવામાં આવતા હતા. પરંતુ જોવાની વાત એ છે કે, જે મશીન કર્મચારીઓની ગેરહાજરીની સમસ્યાનું નિરાકરણ લાવવા માટે મૂકવામાં આવ્યા હતા તે પોતે જ ત્યાંથી ગાયબ છે.

અમદાવાદ મ્યુનિસિપલ કોર્પોરેશન દ્વારા આ બાયોમેટ્રિક સિસ્ટમ માટે 50 લાખ રુપિયાનો ખર્ચ કરવામાં આવ્યો હતો, પરંતુ અત્યારે હાજરી પૂરવાના મશીન ગેરહાજર છે. ઉલ્લેખનીય છે કે, કર્મચારીઓ શિસ્તનું પાલન કરે તે માટે વર્ષ 2019માં તે સમયના મ્યુનિસિપલ કમિશનર વિજય નહેરા દ્વારા આ પહેલ કરવામાં આવી હતી. એક સીનિયર કર્મચારી જણાવે છે કે, એવા ઘણાં કર્મચારીઓ હતા તે મોડા આવતા હતા અને વહેલા નીકળી જતા હતા. ઘણીવાર એક કર્મચારી અન્ય કર્મચારીની સહી પત્રકમાં કરી દેતો હતો. જ્યારે નાગરિકો પોતાની સમસ્યા લઈને ઓફિસ આવે ત્યારે જે તે કર્મચારી જ હાજર ના હોય તો લોકોએ ઘણી સમસ્યાનો સામનો કરવો પડતો હતો. તેમણે એક કામ કરાવવા માટે અનેક ધક્કા ખાવા પડતા હતા. આ સમસ્યાઓનું નિરાકરણ લાવવા માટે AMC દ્વારા બાયોમેટ્રિક સિસ્ટમ મૂકવામાં આવી હતી.


ઉલ્લેખનીય છે કે AMC દ્વારા 23,433 કર્મચારીઓ માટે આ મશીન મૂક્યા હતા, જેમાં 284 ક્લાસ 1 કર્મચારી, 887 ક્લાસ 2 કર્મચારી, 4888 ક્લાસ 3 કર્મચારી અને 17374 ક્લાસ 4 કર્મચારીઓ સામેલ હતા. ઝોનલ ઓફિસ, સબ-ઝોનલ ઓફિસ, માસ્ટર સ્ટેશન્સ, અર્બન હેલ્થ સેન્ટર, કમ્યુનિટી હેલ્થ સેન્ટર સહિત મ્યુનિસિપાલિટીની તમામ ઓફિસોમાં આ મશીન ઈન્સ્ટોલ કરવામાં આવ્યા હતા.

આ સિસ્ટમ લાગૂ કરવામાં આવી ત્યારપછી કોરોના મહામારીને કારણે ભાગ્યે જ કોઈ ઓફિસ આવતુ હતું. AMCના અન્ય એક વરિષ્ઠ કર્મચારી જણાવે છે કે, બે વર્ષમાં તો મશીન નિરર્થક બની ગયા હતા. ડેપ્યુટી મ્યુનિસિપલ કમિશનર(ઈ-ગવર્નન્સ) રમ્યા ભટ્ટ જણાવે છે કે, આ સેવાની સાથે અમને જે કોન્ટ્રાક્ટર આપવામાં આવ્યો હતો, તેના જણાવ્યા અનુસાર આ મશીનો કામના નહોતા રહ્યા. માટે અમે તેમને હટાવી લીધા છે. મારે આ મશીનના સ્ટેટસ ચેક કરવા પડશે.

મુંબઈથી અમદાવાદ આવતી વંદે ભારત એક્સપ્રેસ બે ભેંસ સાથે ટકરાઈ, આગળના ભાગને થયું ડેમેજ
અમારા સહયોગી ટાઈમ્સ ઓફ ઈન્ડિયા દ્વારા ઈ-ગવર્નન્સ વિભાગમાં પૂરછપરછ કરવામાં આવી તો કર્મચારીએ જણાવ્યું કે, બે મહિના પહેલા જ સ્ટેન્ડિંગ કમિટીએ પ્રશ્ન કર્યો હતો કે કર્મચારીઓ સમયસર ઓફિસ કેમ નથી આવતા અને તેમણે બાયોમેટ્રિક હાજરીને ફરજિયાત કરવાનો આગ્રહ કર્યો હતો. અમે કમિટીને જાણકારી આપી હતી કે મશિનો ગાયબ છે. અમુક મશીનો કોન્ટ્રાક્ટરે હટાવ્યા છે, જ્યારે અમુકને હજી પણ ટ્રેસ કરવાના છે. શક્ય છે કે ઓફિસના કોઈ ખૂણામાં તેમને મૂકવામાં આવ્યા હોય.

તાજેતરમાં જ અમદાવાદ મ્યુનિસિપલ કોર્પોરેશન દ્વારા 2.5 કરોડ રુપિયાના ખર્ચે એક મોબાઈલ એપ ડેવલપ કરી છે, જેમાં 2400 કર્મચારીઓનું રજિસ્ટ્રેશન થયેલું છે. AMCમાં વિરોધ પક્ષના નેતા શહેઝાદ ખાન પઠાણ જણાવે છે કે, આ કરદાતાઓના પૈસાનો વેડફાટ છે. ફિન્ગરપ્રિન્ટ અને રેટિના સ્કેનર ક્યાં છે? લાખો રુપિયાની મશીનોનો ક્યારેય યોગ્ય ઉપયોગ કરવામાં નથી આવ્યો. આ બાબતે કાયદેસરની તપાસ થવી જોઈએ.

Read Latest Ahmedabad News And Gujarati News