એક્ઝિટ પોલઃ ગુજરાત પેટાચૂંટણીમાં ભાજપના જંગી વિજય, કોંગ્રેસના ધોવાણની આગાહી

ગુજરાતમાં ભાજપનો દબદબો યથાવત રહેતો જોવા મળી રહ્યો છે. ગુજરાતમાં વિધાનસભાની આઠ બેઠકો માટે યોજાયેલી પેટાચૂંટણીમાં ભાજપને છથી સાત બેઠકો મળી શકે છે. ઈન્ડિયા ટૂડે-એક્સિસ માય ઈન્ડિયા એક્ઝિટ પોલમાં ભાજપને 8માંથી 6થી 7 બેઠકો મળશે તેવું કહેવામાં આવી રહ્યું છે.

કોંગ્રેસને એક જ બેઠક અથવા તો એક પણ બેઠક નહીં મળે તેવું કહેવામાં આવી રહ્યું છે. આ એક્ઝિટ પોલ પ્રમાણે ભાજપને 49 ટકા વોટ મળશે જ્યારે કોંગ્રેસને 40 ટકા વોટ મળશે. બાકીના પક્ષોને 11 ટકા વોટ મળશે.

ગુજરાત વિધાનસભાની આઠ બેઠકો ખાલી પડી હતી. આ બેઠકો માટે ત્રીજી નવેમ્બરે મતદાન થયું હતું. કોંગ્રેસના ધારાસભ્યોના રાજીનામા બાદ આ બેઠકો ખાલી પડી હતી અને તેના માટે ચૂંટણી યોજાઈ હતી. આ આઠેય બેઠકો પર સરેરાશ 58 ટકા મતદાન થયું હતું. સૌથી વધુ મતદાન ડાંગ બેઠક પર 74.71 ટકા જ્યારે સૌથી ઓછુ મતદાન ધારી બેઠક પર 45.74 ટકા થયું હતું. 10 નવેમ્બરે મત ગણતરી થવાની છે.

કોંગ્રેસમાં મોટે પાયે હલચલ મચી હતી અને માર્ચ મહિનામાં પહેલા 5 અને એ પછી 3 ધારાસભ્ય મળીને કોંગ્રેસના કુલ 8 ધારાસભ્યે રાજ્યસભાની ચૂંટણી પહેલાં રાજીનામાં આપ્યાં હતાં. જેમાં કપરાડામાંથી જીતુ ચૌધરી, ડાંગમાંથી મંગળ ગાવિત, લીંબડીમાંથી સોમા પટેલ, ગઢડામાંથી પ્રવીણ મારૂ, ધારીમાંથી જે. વી. કાકડિયા, મોરબીમાંથી બ્રિજેશ મેરજા, કપરાડામાંથી અક્ષય પટેલ અને અબડાસામાંથી પ્રદ્યુમનસિંહ જાડેજાએ રાજીનામાં આપ્યાં હતાં. આમ બે તબક્કામાં 8 બેઠક ખાલી થઈ હતી.