કેન્સર સામે જીતનારા 10 દર્દીઓ પર પુસ્તક લખાયું

નવગુજરાત સમય > અમદાવાદ

કેન્સર જેવા રોગ સામે આકરી લડત આપી જીવન જીવી ગયેલાં દસ લડવૈયા પર ‘ટેન ઓન ટેન’ પુસ્તક લખવામાં આવ્યુ છે. જાણીતાં લેખિકા રક્ષા ભારડીયાના આ પુસ્તકનું બુધવારે અમદાવાદ મેનેજમેન્ટ એસોસિએશન ખાતે વિમોચન કરવામાં આવ્યુ હતું. કેન્સર અંગે લોકોમાં જાગૃતિ વધે તેવા ઉમદા ઉદ્દેશથી અમદાવાદ કેન્સર ફાઉન્ડેશન અને એચસીજી કેન્સર સેન્ટરના ડાયરેક્ટર હેડ એન્ડ નેક ઓન્કોલોજીસ્ટ ડૉ. કૌસ્તુભ પટેલના પ્રયાસના કારણે પુસ્તકને આકાર મળ્યો હતો.

રક્ષા ભારડીયાએ કહ્યુ કે, પુસ્તકમાં એવા યોદ્ધાઓનો ઉલ્લેખ થયો છે, જેમણે કેન્સર સામે જીત હાંસલ કરી છે. આ યોદ્ધાઓ કેન્સર થયું એટલે કેન્સલ થયાની માન્યતા ધરાવતા લોકો માટે ઉદાહરણરૂપ બન્યા છે. અમીતા મોદી ૨૯ વર્ષના હતા ત્યારે તેમની જીભ પર સામાન્ય ચાંદુ પડ્યુ હતું. બાયોપ્સીમાં કેન્સરનું નિદાન થયુ હતું. તે કહે છે કે, કેન્સરનું નિદાન થયું તે સમયની સ્થિતિનો વિચાર કરી આંખોમાંથી આંસુ આવી જાય છે. વહેલા નિદાનના કારણે હું જીવલેણ રોગને મહાત કરી શકી છું. મારે હાલ વર્ષમાં એક વખત રૂટિન ચેકઅપ માટે હોસ્પિટલ જવું પડે છે. બાકી મારી લાઈફ નોર્મલ છે.

મોઈન મોવર સાત વર્ષનો હતો ત્યારે ગળાના ભાગે ગાંઠો થઈ હતી. ગાંઠોની બાયોપ્સી કરાવી ત્યારે ૨૪ જેટલી ગાંઠો કેન્સરની હોવાનુ નિદાન થયુ હતું. હાલ તે પિતાના બિઝનેસમાં સહાય કરે છે. પુસ્તક વિમોચરન કાર્યક્રમમાં મોટી સંખ્યામાં શહેરના પ્રબુદ્ધ નાગરિકો હાજર રહ્યા હતાં.