સીધા દવાની દુકાનેથી તાવની દવા ખરીદો છો? ગુજરાતમાં તમારા પર રખાય છે નજર

અમદાવાદઃ ઘણાં ઘરોમાં સામાન્ય તાવ કે શરદી-ખાંસીની તકલીફ (flu)માં નજીકમાં આવેલી દવાની દુકાનમાંથી સુધી દવા ખરીદી લેવાની આદત હોય છે. પણ કોરોના મહામારીના સમયમાં ગુજરાતના ત્રણ જિલ્લા ગાંધીનગર, અમરેલી અને વલસાડમાંથી સીધી દવાની દુકાનમાંથી દવા ખરીદો છો તો આવા કિસ્સામાં તમારા પર નજર રાખવામાં આવી શકે છે!

જે વાયરલ ઈન્ફેક્શનના લક્ષણો માટેની દવા લેવા માટે આવતા લોકોના સંપર્ક નંબર નોંધવા માટે કલેક્ટર દ્વારા દવાની દુકાનોને જણાવવામાં આવ્યું છે. દવાની દુકાને ખરીદી માટે આવેલા લોકોના જે નંબર લેવામાં આવ્યા છે તેને દરરોજ તેઓ સીધા જિલ્લા વહીવટી તંત્રને સોંપી દે છે. જેમાં ગાંધીનગર કલેક્ટર કચેરી દ્વારા એપ વિકસાવવામાં આવી છે, એટલે કે દવાની દુકાનવાળા શરદી-ખાંસી અને તાવના લક્ષણો માટે દવા લેવા આવેલા લોકોના નંબર સરકારી પોર્ટલ પર પહોંચાડી શકે છે.

સ્વાસ્થ વિભાગની ટીમ આ માહિતીના આધારે પરિવારના સભ્યોના કોવિડ-19 ટેસ્ટ માટે તેમના ઘરે પહોંચે છે. ગાંધીનગરના કલેક્ટર રાકેશ આર્યા જણાવે છે કે, આ પાઈલોટ પ્રોજેક્ટની શરુઆત જુલાઈમાં કરવામાં આવી હતી, આ પછી તમામ કેમિસ્ટ માટે સંપર્ક નંબર લેવાનું અને તેને વહીવટી તંત્ર સુધી પહોંચાડવાનું ફરજિયાત બનાવવામાં આવ્યું. "આ પદ્ધતિથી અમને કોરોના વાયરસને ફેલાતો અટકાવવામાં મદદરુપ બની. હવે અમે ખાનગી દવાખાનામાં પણ આ પદ્ધતિ પ્રમાણે કામગીરી શરુ કરવાનો પ્લાન બનાવી રહ્યા છીએ."

રસપ્રદ વાત એ છે કે, ગાંધીનગર વહીવટી તંત્રને 10-15% એવા લોકો મળ્યા કે જેઓ તાવ અને ફ્લૂના લક્ષણો માટે દવા લેવા આવ્યા હોય. એટલે કે સરેરાશ જિલ્લામાં 1200 લોકો વાયરસ ઈન્ફેક્શનના લક્ષણની દવા ખરીદવા માટે 500 દવાની દુકાનો પર જાય છે.

વલસાડના કલેક્ટર આર આર રાવલ જણાવે છે કે, જિલ્લામાં 151 એક્ટિવ કોવિડ-19 દર્દીઓ છે. એવું જોવા મળ્યું છે કે ફ્લૂ જેવા લક્ષણો હોય તો લોકો સરકારી હોસ્પિટલ અને સ્વાસ્થ્ય કેન્દ્ર પર આવતા અચકાય છે. "અહીં લગભગ 300 દવાની દુકાનો છે અને તે તમામ અમને ડેટા પહોંચાડે છે. આ પછી અમારા સ્વાસ્થ્ય વિભાગના કર્મચારીઓ જે લોકો દવા ખરીદવા ગયા હતા તેમના સંપર્કમાં રહે છે."