ઉત્તરાયણમાં અમદાવાદના પોળ વિસ્તારના ધાબે પોલીસના ચેકિંગ પોઈન્ટ, ડ્રોનથી રાખે છે નજર

અમદાવાદ: હાલ જ્યાં એકબાજુ કોરોનાની મહામારી ખતમ નથી થઈ ત્યાં બીજી બાજુ ઉત્તરાયણના તહેવાર પર લોકોના ટોળા એકત્રિત થાય નહીં અને સોશિયલ ડિસ્ટન્સ જળવાઈ રહે તે માટે પોલીસ દ્વારા નજર રખાઈ રહી છે. અમદાવાદની પોળની ઉત્તરાયણ દેશ-વિદેશમાં પ્રખ્યાત છે ત્યારે પોળના ઘરોના ધાબા પર લોકોના ટોળા ભેગા થાય નહીં અને સોશિયલ ડિસ્ટન્સ જળવાઈ રહે તે માટે શહેરની પોલીસ ચોકસાઈપૂર્વક નજર રાખી રહી છે.

પ્રાપ્ત માહિતી મુજબ, ઉત્તરાયણના તહેવાર પર અમદાવાદના દરેક વિસ્તારમાં પોલીસ પોઈન્ટ ઊભા કરીને લોકો કોરોનાની ગાઈડલાઈનનું પાલન કરે તેનું ચોક્કસ ધ્યાન રાખવામાં આવી રહ્યું છે. શહેરમાં વિવિધ જગ્યાઓ પર ડ્રોન ઉડાવવામાં આવી રહ્યા છે અને ધાબા પર નજર રાખવામાં આવી રહી છે. શહેરના અલગ-અલગ વિસ્તારમાં ડ્રોન ઉડાડીને લોકો ભેગા ના થાય અને મ્યુઝિક સિસ્ટમ વગાડે નહીં વગેરેનું ધ્યાન રાખવામાં આવી રહ્યું છે.

અમદાવાદના પૂર્વ વિસ્તારમાં આવેલી વિવિધ પોળ કે જ્યાં ધૂમધામ પૂર્વક ઉત્તરાયણની ઉજવણી થાય છે અને બહારથી પણ મિત્રો તેમજ મહેમાનો પતંગ ચગાવવા માટે આવતા હોય છે ત્યાં લોકો કોરોનાની ગાઈડલાઈનનું પાલન કરે તે માટે પોલીસે પોળ વિસ્તારમાં કેટલાંક ધાબા પર ચેકિંગ પોઈન્ટ ગોઠવ્યા છે. મળતી માહિતી મુજબ, અમદાવાદના પોળ વિસ્તારમાં રેપિડ એક્શન ફોર્સ દ્વારા ફૂટ ચેકિંગ હાથ ધરાયું હતું અને ડ્રોન દ્વારા મોનિટરિંગની વ્યવસ્થા પણ પોલીસ દ્વારા કરવામાં આવી છે. જેથી પરિસ્થિતિ પર નજર રાખી શકાય અને કોઈ અનિચ્છનિય ઘટનાને ટાળી શકાય.

આ વખતે કોરોનાની મહામારીમાં અમદાવાદના પોળ વિસ્તારમાં ઉત્તરાયણની મજા ફિક્કી રહી હોવાનું જાણવા મળે છે. કારણકે, આ વખતે મ્યુઝિક સિસ્ટમ પર પ્રતિબંધ હોવાથી વધુ અવાજ નથી. ધાબા પર ટોળા નથી અને દર વર્ષે સાંભળવા મળતી બૂમાબૂમનો શોર પણ નથી. ધાબા પર પતંગ ચગાવવા માટે પરિવારના સભ્યો સિવાય વધુ લોકો નહીં હોવાથી ધાબા પર દર વર્ષ જેવી રંગત જોવા મળી રહી નથી.