સેપ્ટની PGમાં વિદેશીઓની ઘેલછાથી ગુજજુઓને નુકસાન

અસ્મિતા દવે > અમદાવાદ asmita.dave@timesgroup.com

અમદાવાદ પાસે સેપ્ટ ઉપરાંત, આઇઆઇએમ, આઇઆઇટી, માઇકા, એનઆઇડી જેવા પ્રીમિયર ઇન્સ્ટિટ્યૂટ તો છે, પણ ઘર આંગણે રહેલી શૈક્ષણિક સંસ્થાઓમાં ગુજરાતી કે સ્થાનિક વિદ્યાર્થીઓની સંખ્યા કેટલી તેના પર હંમેશા સવાલો ઊઠતા રહ્યા છે. આ સંસ્થાઓમાં સેપ્ટ યુનિવર્સિટી એક એવી સંસ્થા છે, જેમાં અન્ય સંસ્થાઓની સરખામણીએ હાલ સુધીમાં ગુજરાતી વિદ્યાર્થીઓની સંખ્યા નોંધપાત્ર રીતે વધુ જોવા મળતી.

પરંતુ હવે સેપ્ટ પણ ગુજરાત બહારના વિદ્યાર્થીઓને વધુ સંખ્યામાં આકર્ષવાનું આયોજન કરી રહી છે ત્યારે આ કાર્યવાહીથી સ્થાનિક વિદ્યાર્થીઓની સંખ્યા પર કેટલી અસર પડશે તેના પર પણ સવાલો ઊભા થઇ રહ્યા છે. તેના કારણોમાં સેપ્ટ યુનિવર્સિટીના અધિકારીઓ જણાવે છે, સેપ્ટ હવે એક હેબિટાટ યુનિવર્સિટી બની ગઇ છે. તેથી દેશના વિવિધ પ્રદેશોમાંથી આવતા સર્જનાત્મક અને તેજસ્વી વિદ્યાર્થીઓ ભૌગોલિક વૈવિધ્યની સાથે સામાજિક અને સાંસ્કૃતિક સમીકરણોની દૃષ્ટિએ પણ યુનિવર્સિટીને સમૃદ્ધ બનાવશે. આ વૈવિધ્ય અને વિશેષતાઓ વિદ્યાર્થીઓને એકબીજા વિશે જાણવામાં મદદરૂપ બનશે.

આ અંગે વાત કરતાં સેપ્ટના ફેકલ્ટી ઓફ પ્લાનિંગના પ્રોફેસર તેમજ એડમિશન કમિટીના ચેરપર્સન સુભ્રાંગ્શુ ગોસ્વામીએ જણાવ્યું કે, ‘અન્ય રાજ્યના વિદ્યાર્થીઓને સેપ્ટ અંગે માહિતગાર કરવા માટે અમે સોશિયલ મીડિયા અને પ્રિન્ટ મીડિયાનો વધુ ઉપયોગ કરી રહ્યા છીએ. તેના માટે અમે ખાસ એડમિશન માટે એક ફેસબુક પેજ પણ શરૂ કર્યું છે. એડમિશન માટેનું ટ્વીટર હેન્ડલર અને ઇન્સ્ટાગ્રામ પેજ પણ બનાવ્યું છે. તે ઉપરાંત આ પ્રકારના કોર્ષ માટે અપ્લાય કરવા ઇચ્છતા વિદ્યાર્થીઓ માટે સેપ્ટના ફેકલ્ટી સાથે લાઇવ ટ્વીટ ચેટ સેશન પણ શરૂ કર્યું છે. ટૂંક સમયમાં માત્ર એડમિશન માટેનો એક વોટ્સએપ નંબર પણ શરૂ કરવાના છીએ. ‘

જ્યારે બહારના વિદ્યાર્થીઓની વધતી સંખ્યાથી થનારી સ્થાનિક વિદ્યાર્થીઓની સંખ્યા પરની અસર અંગે પ્રોફેસર ગોસ્વામીએ જણાવ્યું કે, ‘અન્ડર ગ્રેજ્યુએટ કોર્ષમાં તો અમારે રાજ્ય સરકારની ગાઇડ લાઇન્સ મુજબ અમુક ટકા ફરજિયાત ગુજરાતી વિદ્યાર્થીઓની સીટ અનામત રાખવી પડે. પરંતુ ગુજરાત બહારના વિદ્યાર્થીઓ માટે અમુક સીટ નિશ્ચિત કરવા માટે અમે વાતચીત કરી રહ્યા છીએ. તેથી અન્ડર ગ્રેજ્યુએટ કોર્ષમાં ગુજરાતી વિદ્યાર્થીઓની સંખ્યા ઘટવાની શક્યતા ઓછી છે. ‘

જ્યારે પોસ્ટ ગ્રેજ્યુએટ કોર્ષ અંગે વાત કરતાં પ્રોફેસર સુભ્રાંગ્શુ ગોસ્વામીએ જણાવ્યું હતું કે ‘પોસ્ટ ગ્રેજ્યુએટ કોર્ષમાં આવી કોઇ અનામત કે સીટની સંખ્યાના નિયમો લાગુ પડતા નથી. ૨૦૧૫ના એડમિશનમાં ગુજરાતમાંથી ૪૧ ટકા વિદ્યાર્થીઓ હતા, જ્યારે દેશના અન્ય રાજ્યોમાંથી ૫૯ ટકા વિદ્યાર્થીઓ હતા.’ જ્યારે એક્સચેન્જ પ્રોગ્રામ્સની સ્થિતિ અંગે તેમણે જણાવ્યું કે, ‘સેપ્ટનું યુરોપ, એશિયા, નોર્થ અમેરિકા અને ઓસ્ટ્રેલિયાની ૩૦થી પણ વધુ યુનિવર્સિટી સાથે કોલેબોરેશન છે. તેથી વધુને વધુ યુનિવર્સિટીઝ સાથે કોલેબોરેશન કરીને વધુ વિદેશી વિદ્યાર્થીઓને આવકારવાની તૈયારી કરી રહ્યા છીએ.’ આમ, પરપ્રાંતિય તેમજ વિદેશી વિદ્યાર્થીઓના વધારાથી સેપ્ટ યુનિવર્સિટીને હોસ્ટેલ ફી સહિતની રકમથી આર્થિક ફાયદો રહેશે, જ્યારે સીટ ઘટવાથી સ્થાનિક વિદ્યાર્થીઓને નુકસાન જશે.