રાજ્યમાં કોરોનાના ટેસ્ટ વગર બોગસ રિપોર્ટ ઇસ્યુ કરતી ખાનગી લેબોરેટરી સામે તપાસના આદેશ

ગુજરાતમાં કોરોના વાયરસ માટે એન્ટિજન કે આરટીપીસીઆર ટેસ્ટ કર્યા વગર જ બોગસ રિપોર્ટ આપતી ખાનગી પેથોલોજી લેબોરેટરીઓ સામે હવે કડક પગલા લેવામાં આવશે. મુખ્યમંત્રી વિજય રૂપાણી અને નાયબ મુખ્યમંત્રી નીતિન પટેલની અધ્યક્ષતામાં યોજાયેલી મંત્રી મંડળની બેઠકમાં આ અંગે ચર્ચા કરવામાં આવી હતી અને ત્યારબાદ આરોગ્ય વિભાગને તપાસનો આદેશ આપવામાં આવ્યો છે.

આરોગ્ય વિભાગના અગ્ર સચિવ ડૉ. જયંતી રવિએ આ અંગેની વધુ વિગતો આપતાં જણાવ્યું હતું કે, મુખ્યમંત્રી અને નાયબ મુખ્યમંત્રી દ્વારા યોગ્ય ટેસ્ટિંગ વગર કોવિડ-19ના બોગસ ટેસ્ટ રિપોર્ટ આપતી ખાનગી લેબોરેટરીઓ સામે કડક કાર્યવાહી કરવાની સૂચના આપવામાં આવી છે.

બુધવારે એક અખબાર દ્વારા પ્રકાશિત અહેવાલની રાજ્ય સરકારે ગંભીરતાથી નોંધ લીધી છે. જેમાં સુરત મહાનગર પાલિકાએ સુરતની તેજસ લેબ સામે એપેડેમિક એક્ટ અંતર્ગત તાત્કાલિક કાર્યવાહી કરી છે અને તેનું લાયસન્સ રદ્દ કરવાની કાર્યવાહી પણ હાથ ધરવામાં આવી છે.

જયંતી રવિએ જણાવ્યું હતું કે બોગસ રિપોર્ટ આપતી ખાનગી લેબોરેટરીઓ સામે પોલીસ કાર્યવાહી સહિતના કડક પગલા લેવાનો આદેશ આપી દેવામાં આવ્યો છે. સમગ્ર રાજ્યમાં ખાનગી લેબોરેટરીઓની તપાસ કરાશે. આરોગ્ય વિભાગના ઉચ્ચ અધિકારીઓ ખાનગી લેબોરેટરીની આકસ્મિક તપાસ કરશે અને જિલ્લાકક્ષાની ટીમો પણ તાત્કાલિક ખાનગી લેબોરેટરીઓ ની મુલાકાત લઈને તપાસ કરશે. ક્યાંય પણ ગેરરીતિ થયાનું કે બોગસ ટેસ્ટ રિપોર્ટ અપાયા હોવાનું ધ્યાને આવશે તો કડકમાં કડક કાર્યવાહી કરવામાં આવશે.

રાજ્યની તમામ ખાનગી લેબોરેટરીઓ સ્ટાન્ડર્ડ ઓપરેટીંગ પ્રોસિઝર - એસ.ઓ.પી પ્રમાણે કામગીરી કરે છે કે નહીં, તમામ લેબોરેટરીઓમાં ટેસ્ટિંગના રજિસ્ટરની યોગ્ય જાળવણી થાય છે કે નહીં, તમામ લેબોરેટરીઓમાં યોગ્ય પેથોલોજીસ્ટ ઉપલબ્ધ છે કે નહીં, તમામ લેબોરેટરીઓ બાયોમેડિકલ વેસ્ટનો કઈ રીતે નિકાલ કરે છે વગેરે અંગે કડક તપાસ હાથ ધરવાના આદેશો કરવામાં આવ્યા છે, તેમ જયંતી રવિએ ઉમેર્યું હતું.