મુખ્યમંત્રી વિજય રૂપાણીએ જણાવ્યું, ગુજરાતમાં ક્યારે આવશે કોરોના વેક્સીન

અમદાવાદઃ ગુજરાતમાં કોરોનાના કુલ એક્ટિવ કેસ 13,936 થયા છે. જ્યારે મૃત્યુઆંક પણ 3689 થયો છે. હવે રાજ્યમાં કોરોનાનો કુલ આંકડો પણ 167173એ પહોંચ્યો છે. આ સ્થિતિ વચ્ચે રાજ્યના મુખ્યમંત્રી વિજયભાઈ રુપાણીએ વડોદરા નજીક અણખોલ ગામની સીમમાં 5 લાખ ચોરસ મીટરમાં 100 કરોડના ખર્ચે બનતા મિશન-2026 હેઠળ સરદાર ધામના મધ્ય ગુજરાત પ્રોજેક્ટનો આરંભ કરતા કોરોના વેક્સિન અંગે પણ વાત કરી હતી.

કોરોના રસી અંગે કરી વાત
પ્રોજેક્ટનો શુભારંભ કરાવતા સમયે મુખ્યમંત્રીએ કોરોના રસી અંગે પણ વાત કરી હતી. મુખ્યમંત્રીએ જણાવ્યું હતું કે, ગુજરાતમાં જાન્યુઆરી-ફેબ્રુઆરી મહિના સુધીમાં કોરોનાની રસી આવી જશે. સરદાર ધામ પબ્લિક ટ્રસ્ટ દ્વારા યોજાયેલા આ કાર્યક્રમમાં નીતિન પટેલે ઓનલાઈન હાજરી આપી હતી. આ ઉપરાંત નવરાત્રીમાં રાસ-ગરબા ન યોજવાના નિર્ણયને પણ લોકોએ ટેકો આપ્યો છે તેવું જણાવીને જનતાનો આભાર વ્યક્ત કર્યો હતો.

'કોરોના હારશે, ગુજરાત જીતશે'નો યાદ કર્યો મંત્ર
'કોરોના હારશે, ગુજરાત જીતશે'ના મંત્રને યાદ કરતા મુખ્યમંત્રીએ જણાવ્યુ હતું કે, કોરોનાની રસી ન મળે ત્યાં સુધી સોશિયલ ડિસ્ટન્સ જાળવવું અને માસ્ક પહેરવા જેવા નિયમોનું પાલન કરવું જોઈશે. રાજ્યમાં રિકવરી રેટનું પ્રમાણ વધતા 90% જેટલું થયું છે. મૃત્યુનું પ્રમાણ ઘટાડી શકાયું છે અને દોઢ લાખ લોકો સ્વસ્થ થયા છે. આ ઉપરાંત મુખ્યમંત્રીએ વિજયાદશમીની શુભેચ્છાઓ પણ પાઠવી હતી.

જીનોમ સિકવન્સમાં પણ ગુજરાતની સફળતા
આ પહેલા વિજય રુપાણીએ જણાવ્યુ હતું કે, કોરોનાની રસી શોધવાની દિશામાં ગુજરાતને મોટી સફળતા મળી હતી. ગુજરાતે કોરોના વાયરસની જીનોમ સિકવન્સ શોધી કાઢી હતી. જેથી હવે કોરોનાની વેક્સીન અને દવા બનાવવામાં સરળતા રહેશે. આ રીતે ગુજરાતને કોરોના વાયરસની રસી શોધવા તરફ એક મહત્વની સફળતા મળી છે. કોરોના વાયરસ સામે લડવા માટે PPE સુટ પણ બનાવ્યા હતા ત્યારે ગુજરાતની યશકલગીમાં નવું છોગું ઉમેરાયું છે.