EBC બાદ મુખ્યમંત્રી સ્વાવલંબન યોજનાના અમલ સામે પણ પ્રશ્નાર્થ

નવગુજરાત સમય > અમદાવાદ

રાજ્યમાં પાટીદાર આંદોલનના પગલે તત્કાલીન મુખ્યમંત્રી દ્વારા એમવાયએસવાય (મુખ્યમંત્રી યુવા સ્વાવલંબન) યોજના દાખલ કરવામાં આવી હતી. પહેલા વર્ષે આ યોજનાનો લાભ વિદ્યાર્થીઓને આપવામાં આવ્યો હતો. પરંતુ બીજા વર્ષે હાલ ઇબીસી ઇફેક્ટના પગલે મોટાભાગની કોલેજો અને સંસ્થાઓમાં આ યોજનાનો અમલ શરૂ ન થયો હોવાની વિગતો બહાર આવી છે.

પાટીદાર આંદોલન બાદ તત્કાલીન મુખ્યમંત્રી આનંદીબેન પટેલ દ્વારા દરેક કોર્સમાં ઊંચી ટકાવારી ધરાવતાં હોય તેવા આર્થિક રીતે નબળા વિદ્યાર્થીઓને પ્રોત્સાહન આપવા માટે ખાસ યોજના જાહેર કરવામાં આવી હતી. જેમાં ઊંચી ટકાવારી ધરાવતાં હોય તેવા વિદ્યાર્થીઓ અરજી કરવાની હોય છે. અંડર ગ્રેજ્યુએશન અને પોસ્ટ ગ્રેજ્યુએશન કોર્સમાં ફી ‌અથવા તો 10 હજાર રૂપિયા પૈકી જે ઓછું હોય તે આપવાનું નક્કી કરાયું હતું.

આ જ રીતે મેડિકલ અને ઇજનેરી જેવા પ્રોફેશનલ અભ્યાસક્રમોમાં 50 હજાર રૂપિયા અથવા તો ફી પૈકી જે ઓછું હોય તે આપવાનો નિર્ણય કરાયો હતો.

સૂત્રો કહે છે પહેલા વર્ષ આ પ્રમાણે દરખાસ્ત કરનારા વિદ્યાર્થીઓને આ લાભ આપી દેવાયો હતો. પરંતુ ચાલુ વર્ષે ઇબીસીના કારણે ઊભી થયેલી મુશ્કેલીમાં હજુ અનેક કોલેજોમાં આ યોજના માટેના ફોર્મ જ ભરાયા ન હોવાની ફરિયાદ બહાર આવી છે. દરેક સંસ્થાઓ અને કોલજોએ વિદ્યાર્થીઓને સત્રના પ્રારંભમાં જ આ યોજનાની જાણકારી આપવી તેવી પણ સૂચના આપવામાં આવી હતી.

અનેક સંસ્થાઓમાં અભ્યાસ કરતાં અને આ યોજનામાં લાભ મળવાપાત્ર છે તેવા વિદ્યાર્થીઓને હજુ સુધી આ યોજના અંગે કોઇ જાણકારી કે માર્ગદર્શન જ અપાયું નથી. મોટાભાગની કોલેજોએ આ યોજના હેઠળ વિદ્યાર્થીઓ પાસેથી ફોર્મ પણ ભરાવ્યા નથી. જેના કારણે આ યોજનાનો લાભ વિદ્યાર્થીઓને મળવાનો ચાલુ રહેશે કે નહીં તે અંગે પણ અટકળો ઊભી થઇ છે.

હાલમાં ઇબીસીના કારણે અનેક કોલેજોમાં નિયમિત રીતે અભ્યાસ શરૂ થઇ શકયો નથી. આગામી દિવસોમાં નવેસરથી બીજા રાઉન્ડની પ્રવેશ પ્રક્રિયા શરૂ થવાની છે. આ સ્થિતિમાં આર્થિક રીતે નબળા હોય તેવા વિદ્યાર્થીઓ માટે લાભદાયી આ યોજનાનો અમલ થશે કે કેમ તેવો પ્રશ્ન ઊભો થયો છે. કોલેજ સંચાલકો કહે છે કે, ટેકનિકલ કોર્સમાં પ્રવેશ પ્રક્રિયા પૂર્ણ થાય અને નિયમિત રીતે વર્ગો શરૂ થાય પછી સરકારની સૂચના પ્રમાણે આ યોજના માટેના ફોર્મ ભરવાની પ્રક્રિયા શરૂ કરાશે.