ઘરેથી જ ઉપવાસ આંદોલન કરશે હાર્દિક પટેલ!

I am Gujarat

હાર્દિકના ઉપવાસ આંદોલનને ઝટકો

ગાંધીનગરઃ રાજ્યમાં ફરી એકવાર પાટીદારોનું અનામત માટેનું આંદોલન સક્રિય થયું છે. જે અંતર્ગત હાર્દિક પટેલે 25મી ઓગસ્ટથી આમરણાંત ઉપવાસ આંદોલન શરૂ કરવાની જાહેરાત કરી હતી. જોકે આ ઉપવાસ આંદોલનના એક દિવસ પહેલા જ હાર્દિકને મોટો ઝટકો મળ્યો છે. હાર્દિકે ગાંધીનગરમાં ઉપવાસ આંદોલન માટે માગેલી મંજૂરીને કલેક્ટરી નકારી દીધી છે.

કલેક્ટરે ન આપી મંજૂરી

આ વિશે ગાંધીનગરના કલેક્ટર એસ.કે લાંબાએ શુક્રવારે સાંજે પ્રેસ કોન્ફરન્સ કરી જણાવ્યું હતું. તેમણે કહ્યું કે, પોલીસ સાથે ચર્ચા અને અભિપ્રાય બાદ સુરક્ષાના કારણોસર આ પ્રકારના આંદોલન માટે પરમીશન નહીં આપવાનો નિર્ણય લેવામાં આવ્યો છે.

હાર્દિકે સત્યાગ્રહ છાવણી માટે માગી હતી મંજૂરી

આ પહેલા ગાંધીનગરમાં પાસ કમિટિના સભ્ય ઉત્પલ પટેલના નામથી સત્યાગ્રહ છાવણીમાં આમરણ ઉપવાસ આંદોલન માટે પરવાનગી માગવામાં આવી હતી. આયોજકોએ 25,000 લોકો એકઠા થશે એવો દાવો કર્યો હતો. જોકે કલેક્ટરના આ નિર્ણય બાદ હવે હાર્દિક પોતાના ઘરેથી જ ઉપવાસ આંદોલન શરૂ કરી શકે છે.

હવે ઘરેથી કરશે ઉપવાસ?

રાજયમાં પાટીદારોને અભ્યાસમાં અનામતનો લાભ, ખેડૂતોની લોન માફી અને નોકરી જેવા મુદ્દાઓ સાથે આમરણાંત આંદોલન કરવાની જાહેરાત હાર્દિકે કરી હતી. આ માટે હાર્દિકે સૌથી પહેલા અમદાવાદના નિકોલમાં પરવાનગી માગી હતી. પરંતુ તેને પરવાનગી મળી નહોતી. જે બાદ સત્યાગ્રહ છાવણી ખાતે ઉપવાસ આંદોલન માટે પરવાનગી માગી હતી. હાર્દિક આ પહેલા જ સ્પષ્ટ કરી ચૂક્યો છે કે જો તેને આંદોલન માટે પરવાનગી નહીં મળે તો તે ઘરેથી જ ઉપવાસ આંદોલન કરશે.

અલ્પેશ કથિરિયાના વધુ 2 દિવસના રિમાન્ડ મંજૂર

ઉલ્લેખનીય છે કે આ પહેલા 19મી ઓગસ્ટે બે વર્ષ જૂના રાજદ્રોહના કેસમાં હાર્દિક પટેલ અને અલ્પેશ કથિરિયાની અટકાયત કરાઈ હતી. જે બાદ સુરતમાં આગચંપની ઘટના સામે આવી હતી. કોર્ટે અલ્પેશના 4 દિવસમાં રિમાન્ડ મંજૂર કર્યા હતા. ત્યારે હવે ફરીથી હાર્દિકના ઉપવાસ આંદોલન પહેલા અલ્પેશના વધુ 2 દિવસના રિમાન્ડ મંજૂર કરવામાં આવ્યા છે.