અમદાવાદ: હવે ફેક કોલ સેન્ટર ચલાવનારા મુખ્ય આરોપી સામે 'PASA' લગાવાશે

અમદાવાદઃ ફેક કોલ સેન્ટરના વધુથી વધુ કિસ્સાઓ સામે આવી રહ્યા છે, ત્યારે અમદાવાદ શહેર પોલીસે આવા ભેજાબાજો વિરુદ્ધ PASA (પ્રિવેન્શન ઓફ એન્ટી-સોશિયલ એક્ટિવિટી) હેઠળ ફરિયાદ નોંધીને જેલના સળિયા પાછળ મોકલવાનું નક્કી કર્યું છે. અત્યાર સુધીમાં આવા ફેક કોલ સેન્ટરો દ્વારા સૌથી વધુ અમેરિકાના નાગરિકોને શિકાર બનાવવામાં આવતા હતા.

શહેરના સીનિયર પોલીસ અધિકારીએ જણાવ્યું કે, ફેક કોલ સેન્ટર ચલાવનારા મુખ્ય આરોપી પર PASA હેઠળ ફરિયાદ નોંધવાનું સૌથી પહેલા અમદાવાદમાં શરૂ કરવામાં આવશે. આ વર્ષમાં જ શહેરમાં 10 જેટલા ફેક કોલ સેન્ટર પકડાઈ ચૂક્યા છે. જ્યારે આ બાદ રાજ્યના જુદા જુદા ભાગોમાં પણ તેનો અમલ કરવામાં આવશે.

શહેર પોલીસ કમિશનર સંજય શ્રીવાસ્તવએ કહ્યું કે, PASA માત્ર એવા લોકો સામે જ લગાવવામાં આવશે જેમાં આરોપી વિરુદ્ધ ફેક કોલ સેન્ટર ચલાવવાના પૂરતા પૂરાવાઓ હોય. શહેર પોલીસના સીનિયર અધિકારીએ જણાવ્યું કે, 2017માં કેટલાક ફેક કોલ સેન્ટર ચલાવનારા આરોપીઓને PASA હેઠળ ધરપકડ કરાઈ હતી, પરંતુ ગુજરાત હાઈકોર્ટમાંથી ઠપકો મળ્યા બાદ તેમના પર PASA લગાવવાનો વિચાર પડતો મૂકવામાં આવ્યો.

હવે એવું નક્કી કરવામાં આવ્યું છે કે, ફેક કોલ સેન્ટર મામલે જીણવટ પૂર્વક તપાસ કરવામાં આવે, જેમાં મુખ્ય આરોપીની અન્ય ગેરકાયદે પ્રવૃત્તિઓમાં પણ સંડોવણી હોવાનું બહાર આવશે તેવું અનુમાન છે અને આમ તેની વિરુદ્ધ PASA લાગશે.

પોલીસ અધિકારીએ જણાવ્યું કે, અમેરિકન નાગરિકોનો ડેટા મુખ્ય રીતે મુંબઈના કોઈ વ્યક્તિ અથવા આ પ્રકારની ગેરકાયદે પ્રવૃત્તિમાં પહેલાથી સંકળાયેલા હોય તેમની પાસેથી લેવામાં આવતો હોય છે. આથી મુખ્ય આરોપી એક કૌભાંડની સાથે અન્ય કૌભાંડમાં પણ સંકળાઈ જાય છે. આવી રીતે મોટાભાગના મુખ્ય આરોપીઓ જુદા જુદા ફેક કોલ સેન્ટર સાથે જોડાયેલા છે તે સાબિત કરવું પડશે.

અધિકારીએ કહ્યું કે, હાલમાં જ સાબરમતી રિવરફ્રન્ટ પોલીસ દ્વારા ફેક કોલ સેન્ટર ચલાવતા બે વ્યક્તિને પકડવામાં આવ્યા હતા. આ બંને સામે પણ PASA હેઠળ ફરિયાદ નોંધવામાં આવશે. આ પહેલા ફેક કોલ સેન્ટર ચલાવતા આરોપીઓ વિરુદ્ધ ઈન્ફોર્મેશન ટેકનોલોજી એક્ટ અને IPC હેઠળ છેતરપિંડીની કલમો લગાવવામાં આવતી. પરિણામે તેમને સરળતાથી જામીન મળી જતા હતા.

અધિકારી કહે છે કે, હવે PASAની અરજીને લાગુ કરવા માટે ગુનાહિત ષડયંત્રનો આરોપ ઉમેરવામાં આવશે. આવા આરોપીઓને PASA હેઠળ જેલમાં પૂરવાથી આ પ્રકારની ઘટનાઓ પર અંકુશ આવશે. પોલીસ મુજબ, જો તેઓ લાંબા સમય સુધી જેલમાં રહેશે તો તેમની લિંક તૂટશે અને ગેરકાયદે પ્રવૃત્તિઓ અટકશે.