કોંગ્રેસમાં ડખોઃ બાપુના કાર્યક્રમમાં ન જવા કોંગ્રેસીઓને ફરમાન

I am Gujarat

શંકરસિંહ અને કોંગ્રેસ સામ સામે

શંકરસિંહ વાઘેલા (ફાઈલ ફોટો) અમદાવાદઃ ગુજરાતમાં વિધાનસભાની ચૂંટણી પહેલા વિરોધપક્ષના નેતા ખુદ પોતાના જ પક્ષના વિરોધમાં હોય તેવું લાગી રહ્યું છે. કોંગ્રેસ નેતા શંકરસિંહ વાઘેલાએ શુક્રવારે પોતાના જન્મદિવસના રોજ જાહેર કરેલા કાર્યક્રમ પર રાજકીય નેતાઓની નજર મંડાઇ છે. આ કાર્યક્રમમાં શંકરસિંહ કોઈ મોટો ઘડાકો કરી શકે તેવી અટકળો ચાલી રહી છે. શંકરસિંહના આ કાર્યક્રમમાં કોઈ કોંગ્રેસી ધારાસભ્યોને ન જવા ફરમાન કોંગ્રેસ દ્વારા આપવામાં આવ્યું છે. આ ઉપરાંત AICC શંકર સિંહને શો કોઝ નોટિસ પાઠવે તેવી શક્યતા છે.

જન્મદિવસની ઉજવણીમાં ન જવા ફરમાન

શંકરસિંહ વાઘેલા અને ભરતસિંહ સોલંકી (ફાઈલ ફોટો) ગાંધીનગરમાં શંકરસિંહ વાઘેલાના જન્મ દિવસની ઉજવણીના કાર્યક્રમમાં કોંગ્રેસના ક્યાં ક્યાં ધારાસભ્યો અને કાર્યકરો સહિત આગેવાનો ઉપસ્થિત રહેનાર છે તેને લઇને અટકળો ચાલી રહી છે. આવામાં કોંગ્રેસમાં ચાલી રહેલા ઘમાસાણ વચ્ચે કોંગ્રેસ પ્રદેશ અધ્યક્ષ ભરતસિંહ સોલંકીએ મહત્વનું નિવેદન આપ્યું છે. ભરતસિંહે કોંગ્રેસના કોઈપણ ધારાસભ્યને બાપુના જન્મદિવસમાં ન જવાનું ફરમાન કર્યું છે.

કોંગ્રેસના ધારાસભ્યો દ્વારા ક્રોસ વોટિંગ

શંકરસિંહ વાઘેલા (ફાઈલ ફોટો) આગામી ચૂંટણી માટે ઉમેદવારોની પસંદગી બાબતે થયેલા વિવાદ બાદ કોંગ્રેસના નેતાઓ અને શંકરસિંહ બાપુ એક બીજાની સામે આવી ગયા છે. ગુરૂવારે રાષ્ટ્રપતિની ચૂંટણીના પરિણામમાં કોંગ્રેસના ધારાસભ્યો દ્વારા ક્રોસ વોટિંગનો મામલો સામે આવ્યો છે.

જન્મ દિવસના નામે શક્તિ પ્રદર્શન

કોંગ્રેસ નેતા સિદ્ધાર્થ પટેલ (ફાઈલ ફોટો) અમદાવાદના એનેક્સી ખાતે આજે કોંગ્રેસ સમિતિની બેઠક મળી હતી. આ બેઠક બાદ કોંગ્રેસ નેતા સિદ્ધાર્થ પટેલે કહ્યું હતું કે, બાપુના જન્મદિવસના કાર્યક્રમનો રાજકીય ઉપયોગ થાય એ ઈચ્છનિય નથી. મહત્વનું છે કે બાપુ જન્મ દિવસના નામે ગાંધીનગરમાં શક્તિ પ્રદર્શન કરી રહ્યાં છે. બાપુની જાહેરાત બાદ કોંગ્રેસના નેતાઓ દોડતા થયા છે ત્યારે બાપુ કંઇક નવા-જૂની કરશે તે તો આવતીકાલે જ ખબર પડશે.