કોંગ્રેસના રાજ્યસભા સાંસદ શક્તિસિંહ ગોહિલને થયો કોરોના

કોંગ્રેસના નેતા અહમદ પટેલ, ભરતસિંહ સોલંકી કોરોનાની ઝપેટમાં આવ્યા પછી વધુ એક કોંગ્રેસના નેતાને કોરોના થયો છે. કોંગ્રેસના રાજયસભા સાંસદ શક્તિસિંહ ગોહિલનો કોરોના રિપોર્ટ પોઝિટિવ આવ્યો છે. કોરોના રિપોર્ટ પોઝિટિવ હોવાની માહિતી તેમણે ટ્વીટર પર રિપોર્ટ શૅર કરીને આપી હતી. રિપોર્ટ શૅર કરીને તેમણે લોકોની શુભકામનાથી કોરોનાને હરાવશે તેવો પણ ઉલ્લેખ કર્યો હતો. નોંધનીય છે કે આ પહેલા અનેક રાજનેતાઓને કોરોનાની મહામારીમાં સપડાઈ ચૂક્યા છે.


સોશિયલ મીડિયા પર શૅર કર્યો રિપોર્ટ
કોંગ્રેસના રાજ્ય સભા સાંસદ શક્તિસિંહ ગોહિલને કોરોના થયો છે. સોશિયલ મીડિયા પર પોતાનો રિપોર્ટ શેર કરવાની સાથે જ તેમણે લખ્યું હતું કે, "આજે કોરોના ટેસ્ટ કરાવ્યો, જે પોઝિટિવ આવ્યો છે. લોકોની શુભકામના સાથે હું કોરોનાને હરાવીશ." જોકે, તેમની ટ્વીટ પરથી અંદાજો લગાવી શકાય છે કે હાલ તેમનું સ્વાસ્થ્ય સારું છે અને તેમણે એ વાતનો પણ ઉલ્લેખ કર્યો છે કે ચિંતા કરવાની કોઈ જરુર નથી.

લાંબો સમય હોસ્પિટલમાં રહેનાર દર્દી બન્યા હતા ભરતસિંહ
નોંધનીય છે કે આ પહેલા કોંગ્રેસના ભરતસિંહ સોલંકી કોરોના મહામારીમાં લાંબો સમય સુધી સારવાર લેનારા એશિયાના પ્રથમ દર્દી બન્યા હતાં. તેઓ હોસ્પિટલમાં 102 દિવસ પૂરા કરીને કોરોનાને હરાવીને પરત ફર્યા હતાં. ભરતસિંહની સારવારમાં પ્લાઝમા થેરાપી તેમજ ટોસિલિઝુમેબ ઈન્જેક્શનનો પણ ઉપયોગ કરવામાં આવ્યો હતો.