ગુજરાત સરકારે 58 કરોડ રુપિયાના ખર્ચે ચાઈનીઝ ટેબલેટ્સ ખરીદ્યાઃ કોંગ્રેસ

અમદાવાદઃ ભારત અને ચીન વચ્ચે સરહદ પર ચાલી રહેલી ગતિવિધિના કારણે દેશમાં ચીની સામાનનો જોરશોરથી વિરોધ થઈ રહ્યો છે. ત્યારે કોંગ્રેસે રાજ્ય સરકાર પર મોટો આક્ષેપ કર્યો છે. કોંગ્રેસે ગુજરાત સરકારે ચીન પાસેથી 58 કરોડના 40,000 ટેબલેટ્સ ખરીદ્યાનો આક્ષેપ મૂક્યો છે.મીડિયા રિપોર્ટ્સ મુજબ, કોંગ્રેસના પ્રવક્તા મનિષ દોશીએ 58 કરોડના ટેબલેટ્સ રાજ્ય સરકાર દ્વારા ખરીદવામાં આવ્યા હોવાનો આક્ષેપ મૂક્યો છે. તેમણે કહ્યું છે કે, આત્મનિર્ભર બનવાની સુફિયાણી વાતો કરનારા ભાજપનો ચાઈના પ્રેમ ખુલ્લો પડી ગયો છે. તેમણે આ પ્રકારના કામ બદલ શિક્ષણમંત્રીના રાજીનામાની પણ માગણી કરી છે. આ ટેબલેટ્સની ખરીદી કેન્દ્રના સર્વ શિક્ષા અભિયાનના ફંડમાંથી કરવામાં આવી હોવાનું પણ જણાવાયું છે.ઓનલાઈન હાજરી માટે આ મેઈડ ઈન ચાઈનાના ટેબલેટ્સ મંગાવવામાં આવ્યા હોવાનું જણાવાયું છે. તેમણે આગળ જણાવ્યું કે, દેશમાં ચીન સામે રોષ ઉભરાઈ રહ્યો છે ત્યારે ગુજરાત ભાજપ સરકારને ચીન પ્રત્યે પ્રેમ ઉભરાઈ રહ્યો છે. કોંગ્રેસ દ્વારા કરોડોના ટેબલેટ્સ રાજ્ય સરકાર દ્વારા ખરીદવામાં આવ્યા હોવાની વાત કરીને આ મુદ્દે જવાબદારી સ્વીકારીને શિક્ષણમંત્રી રાજીનામું આપવું જોઈએ તેવી પણ માગણી કરી.