કોરોનાની સારવાર લઈ રહેલા ભરતસિંહ સોલંકીની તબિયત સુધારા પર, ચાલવાનું શરૂ કર્યું

અમદાવાદ: કોંગ્રેસના નેતા ભરતસિંહ સોલંકી છેલ્લા ઘણા સમયથી કોરોનાની સારવાર લઈ રહ્યા છે. જોકે, હવે તેમની તબિયત સુધારા પર છે. તેમનો એક નવો વિડીયો સામે આવ્યો છે, જેમાં તેઓ વોક લેતા જોવા મળી રહ્યા છે. કોંગ્રેસના દિગ્ગજ નેતા ભરતસિંહ સોલંકીની તબિયત સુધારા પર હોવું પક્ષ માટે પણ એક રાહતના સમાચાર છે. એવી પણ શક્યતા વ્યક્ત કરવામાં આવી છે કે, તેમને ટૂંક સમયમાં હોસ્પિટલમાં રજા આપી દેવામાં આવશે.

ભરતસિંહ સોલંકીની છેલ્લા અઢી મહિના કરતા વધુ સમયથી કોરોનાની સારવાર ચાલી રહી છે. અમદાવાદની સિમ્સ હોસ્પિટલમાં તેઓ એડમિટ છે. તેમની તબિયત એટલી ગંભીર થઈ ગઈ હતી કે 45 દિવસ સુધી તેમને વેન્ટિલેટર પર રાખવા પડ્યા હતા. જોકે, હાલ તેમની તબિયત સુધારા પર છે. તેમનો એક નવો વિડીયો સામે આવ્યો છે, જેમાં તેમણે ચાલવાનું શરૂ કર્યું હોવાનું દેખાઈ રહ્યું છે.

ભરતસિંહ સોલંકીને કોરોના થયો તે પછી તેમની તસવીર સામે આવી ત્યારે લોકો આશ્ચર્યમાં મૂકાઈ ગયા હતા. કેમકે, ભરતસિંહને ઓળખવા પણ મુશ્કેલ થઈ ગયા હતા. ગત 19 જૂને રાજ્યસભાની ચૂંટણી પૂરી થયા બાદ તરતજ ભરતસિંહ સોલંકી કોરોના પોઝિટિવ હોવાના અહેવાલ બહાર આવ્યા હતા.

ગત 21 જૂને તબિયત અસ્વસ્થ જણાતા ભરતસિંહ સોલંકી વડોદરાની બેન્કર હોસ્પિટલમાં એડમિટ થયા હતા, જ્યાં તેમનો કોરોના રિપોર્ટ પોઝિટિવ આવ્યા હતો. આ હોસ્પિટલમાં સારવાર બાદ તેમને વધુ સારવાર માટે અમદાવાદની સિમ્સ હોસ્પિટલમાં રિફર કરાયા હતા અને 28 જૂનની મધરાતે તેમને અમદાવાદ લાવવામાં આવ્યા હતા. ત્યારથી તેઓ સિમ્સ હોસ્પિટલમાં છે. કોરોનાના કારમે તેમનું શરીર એટલું ઉતરી ગયું છે કે જો જૂની તસવીર સાથે સરખાવવામાં ન આવે તો હાલની તસવીર જોઈને તેમને ઓળખવા પણ મુશ્કેલ છે. જોકે, કોરોનાને હરાવવામાં તેઓ સફળ રહ્યા છે અને ધીરે-ધીરે રિકવર થઈ રહ્યા છે અને તેમાંય તેમનો વોક લેતો વિડીયો સામે આવ્યા બાદ હવે તેઓ જલદી સાજા થઈ જશે તેવી શક્યતા વ્યક્ત કરવામાં આવી રહી છે.

ઉલ્લેખનીય છે કે, રાજ્યસભાની ચૂંટણીમાં ગુજરાતમાંથી ભરતસિંહ સોલંકી પણ કોંગ્રેસ તરફથી ઉમેદવાર હતા. જોકે, તેમને સફળતા મળી ન હતી. કોંગ્રેસ તરફથી બીજા ઉમેદવાર શક્તિસિંહ ગોહિલ વિજયી થયા હતા. રાજ્યસભાની ચૂંટણીમાં ગુજરાતની ચાર બેઠકમાંથી પર કોંગ્રેસ અને ત્રણ પર ભાજપનો વિજય થયો હતો.