કોરોનાની ચિંતાજનક પરિસ્થિતિ વચ્ચે PIની ફિઝિકલ ટેસ્ટ અંગે GPSCનો મહત્વનો નિર્ણય

ગુજરાતમાં કોરોના વાયરસ કાબૂ બહાર જઈ રહ્યો છે તેવામાં ચાર મહાનગરોમાં રાત્રી કર્ફ્યૂ પણ લગાવવામાં આવ્યો છે. આ ઉપરાંત હવે લોકડાઉનના ભણકારા વાગી રહ્યા છે તેવામાં વિવિધ શૈક્ષણિક પરીક્ષાઓને અસર પડી શકે છે. તેવામાં પોલીસ ઈન્સપેક્ટર (PI)ની ફિઝિકલ ટેસ્ટને લઈને જીપીએસસી દ્વારા એક મહત્વનો નિર્ણય લેવામાં આવ્યો છે. જે મુજબ હવે કોવિડ પોઝિટિવ ઉમેદવારોને પરીક્ષા માટે તક આપવામાં આવશે.

22થી 26 એપ્રિલ દરમિયાન ફિઝિકલ ટેસ્ટમાં હાજર ન રહી શકનારા ઉમેદવારોને બીજી તક આપવામાં આવશે. પીઆઈ માટેની મુખ્ય પરીક્ષા અગાઉ કોરોના પોઝિટિવ ઉમેદવારોની પરીક્ષા લેવામાં આવશે. કોરોનાના વધી રહેલા કેસને જોતા જીપીએસસી એ મહત્વનો નિર્ણય લીધો છે જેથી કરીને કોઈ ઉમેદવાર પરીક્ષા વગર રહી ન જાય.

નોંધનીય છે કે રાજ્યમાં પીઆઈની પરીક્ષામાં પાસ થયેલા ઉમેદવારોની ફિઝિકલ ટેસ્ટ લેવાની છે. જીપીએસસી દ્વારા આ ફિઝિકલ ટેસ્ટ માટે 22થી 26 એપ્રિલની તારીખ જાહેર કરી હતી. પીઆઈની મુખ્ય પરીક્ષા 19થી 20 જૂન દરમિયાન લેવામાં આવશે.