કોરોના વાયરસઃ અમદાવાદમાં 154 અને સુરતમાં 119 નવા કેસ નોંધાયા

ગુજરાતમાં કોરોના વાયરસની ગતિ થોડી ધીમી પડી છે અને દૈનિક કેસ સતત ઘટી રહ્યા છે. ગુજરાતમાં દૈનિક કેસની સંખ્યા 800થી નીચે પહોંચી ગઈ છે. ગુજરાતના ચાર મોટા શહેરો અમદાવાદ, સુરત, વડોદરા અને રાજકોટમાં પણ કેસ ઘટ્યા છે. જોકે, છેલ્લા 24 કલાકમાં વડોદરામાં કેસમાં નજીવો વધારો થયો છે. વડોદરામાં કેસની સંખ્યા 100થી નીચે આવી ગયા હતા પરંતુ આજે 100થી વધુ કેસ નોંધાયા છે.

અમદાવાદ શહેરમાં કોવિડ-19ના કેસની સંખ્યા હવે 150ની નજીક પહોંચી ગઈ છે. છેલ્લા 24 કલાકમાં અમદાવાદ શહેરમાં કોરોનાના 154 નવા કેસ નોંધાયા છે જેની સામે 158 દર્દીઓ સાજા થઈને ઘરે ગયા છે. અમદાવાદ જિલ્લામાં છ કેસ નોંધાયા છે અને પાંચ દર્દીઓ સાજા થયા છે. અમદાવાદ શહેરમાં કોરોનાથી ત્રણ દર્દીઓના મોત થયા છે.

અમદાવાદ બાદ સુરત સૌથી વધારે અસરગ્રસ્ત શહેર હતું પરંતુ અમદાવાદની જેમ અહીં પણ કોરોનાની પરિસ્થિતિમાં સતત સુધારો થઈ રહ્યો છે અને કેસની સંખ્યા ઘટી રહી છે. સુરત શહેરમાં છેલ્લા 24 કલાકમાં કોરોનાના 119 નવા કેસ સામે આવ્યા છે અને 121 દર્દીઓ સાજા થયા છે. સુરત જિલ્લામાં 26 કેસ નોંધાયા છે અને 24 દર્દીઓ સાજા થયા છે. કોરોનાના કારણે સુરત શહેરમાં એક દર્દીનું મૃત્યુ થયું છે જ્યારે સુરત જિલ્લામાં એક પણ મૃત્યુ નોંધાયું નથી.

વડોદરા શહેરમાં કોરોનાના કેસની સંખ્યા 100થી નીચે આવી ગઈ હતી પરંતુ છેલ્લા 24 કલાકમાં 100થી વધુ કેસ સામે આવ્યા છે. વડોદરા શહેરમાં કોવિડ-19ના 106 નવા કેસ સામે આવ્યા છે. જ્યારે 147 દર્દીઓ સાજા થઈને ઘરે ગયા છે. વડોદરા જિલ્લામાં 29 નવા કેસ નોંધાયા છે અને 23 દર્દીઓ સાજા થયા છે. વડોદરા શહેર અને જિલ્લામાં કોરોનાથી એક પણ દર્દીનું મૃત્યુ થયું નથી.

રાજકોટ શહેરમાં છેલ્લા 24 કલાકમાં કોવિડ-19ના 64 કેસ સામે આવ્યા છે અને 62 દર્દીઓ ડિસ્ચાર્જ થયા છે. રાજકોટ જિલ્લામાં 22 કેસ નોંધાયા છે જેની સામે 56 દર્દીઓ ડિસ્ચાર્જ થયા છે. રાજકોટ શહેર કે જિલ્લામાં પણ કોરોનાથી એક પણ દર્દીનું મૃત્યુ થયું નથી.