કોરોનાઃ છેલ્લા 24 કલાકમાં ગુજરાતમાં 1790 કેસ નોંધાયા, મૃત્યુઆંકમાં પણ થયો વધારો

ગુજરાતમાં કોરોના વાયરસના કેસની સંખ્યામાં દરરોજ વધારો થઈ રહ્યો છે. ગુજરાતમાં દૈનિક કેસની સંખ્યા 1800ની નજીક પહોંચી ગઈ છે. છેલ્લા 24 કલાકમાં ગુજરાતમાં કોવિડ-19ના 1790 નવા કેસ નોંધાયા છે. જ્યારે 1277 દર્દીઓ સાજા થયા છે. છેલ્લા 24 કલાકમાં રાજ્યમાં કોરોનાથી થયેલા મૃત્યુની સંખ્યામાં પણ વધારો થયો છે. ગુજરાતમાં કોરોનાના કારણે 8 દર્દીઓએ પોતાનો જીવ ગુમાવ્યો છે. જેમાં અમદાવાદ અને સુરત કોર્પોરેશનમાં બે-બે, ગાંધીનગર, જામનગર કોર્પોરેશન, રાજકોટ કોર્પોરેશન અને વડોદરા કોર્પોરેશનમાં 1-1 દર્દીનું મોત થયું છે.

રાજ્યમાં હાલમાં 8823 એક્ટિવ કેસ છે જેમાંથી 8744 સ્ટેબ છે જ્યારે 79 વેન્ટિલેટર પર છે. રાજ્યમાં અત્યાર સુધી 4466 દર્દીઓએ જીવ ગુમાવ્યા છે. જ્યારે 2,78,880 દર્દીઓ ડિસ્ચાર્જ થયા છે. રાજ્યમાં રિકવરી રેટ 95.45 ટકા છે. કોરોનાનો ચેપ વધારે ન ફેલાય તે માટે ધન્વંતરી રથની સેવા પણ વધારી દેવામાં આવી છે. ધન્વંતરી રથની સંખ્યા 775થી વધારીને 958 કરી દેવામાં આવી છે.

રાજ્યમાં કોરોનાની નવી લહેરના કારણે કેસમાં સતત વધારો થઈ રહ્યો છે. જેના કારણે પરિસ્થિતિ ચિંતાજનક બની રહી છે. તેમાં અમદાવાદ અને સુરત શહેરમાં પરિસ્થિતિ નિંયત્રણની બહાર જતી જોવા મળી રહી છે. અમદાવાદ શહેરમાં 506 નવા કેસ નોંધાયા છે જ્યારે 459 દર્દીઓ ડિસ્ચાર્જ થયા છે. જ્યારે અમદાવાદ જિલ્લામાં આઠ નવા કેસ સામે આવ્યા છે.

સુરતમાં પણ પરિસ્થિતિ કાબૂ બહાર જઈ રહી છે. સુરત શહેરમાં 480 અને સુરત જિલ્લામાં 102 એમ કુલ 582 કેસ નોંધાયા છે. સુરત શહેરમાં 316 દર્દીઓ સાજા થયા છે. આ ઉપરાંત વડોદરા શહેરમાં 145 કેસ તથા રાજકોટ શહેરમાં 130 કેસ નોંધાયા છે.

ગુજરાતના પાડોશી રાજ્ય મહારાષ્ટ્રમાં કોરોનાના કેસની સંખ્યા રોકેટ ગતિએ વધી રહી છે. જેથી ત્યાંથી આવતા લોકો દ્વારા રાજ્યમાં વધારે ચેપ ન ફેલાય તે માટે મહત્વનો નિર્ણય લેવામાં આવ્યો છે. મહારાષ્ટ્રમાંથી આવતા વ્યક્તિઓ માટે કોવિડ-19નો RTPCR ટેસ્ટ ફરજીયાત કરવામાં આવ્યો છે. રાજ્યમાં અત્યાર સુધી કુલ 1,90,858 લોકોને કોરોનાની રસી આપવામાં આવી છે.