રેમડેસિવિરના ઉપયોગમાં મોટો ઉછાળો
ડોક્ટર્સે જણાવ્યું છે કે મોટા ભાગના દર્દીઓ 50 વર્ષની વયથી ઉપરના છે અને તેઓ ગંભીર ચેપથી પીડાઈ રહ્યા છે અથવા તો તેમને વધારે ઓક્સિજનની જરૂર પડે છે. એએચએનએના પ્રમુખ ડોક્ટર ભરત ગઢવીએ અમારા સહયોગી અમદાવાદ મિરરને જણાવ્યું હતું કે, છેલ્લા એક સપ્તાહમાં 50 વર્ષથી વધુની વય ધરાવતા દર્દીઓની સંખ્યા 90 ટકા જેટલી રહી હતી. તેમાંથી મોટા ભાગના લોકોમાં કોરોનાના ચેપની અસર ગંભીર હતી. તેથી આ સમયગાળા દરમિયાન હોસ્પિટલોએ રેમડેસિવિરનો ઉપયોગ બે ગણો થઈ ગયો હતો.
શહેરના ડોક્ટર્સ રેમડેસિવિરના ઉપયોગનું કરી રહ્યા છે સમર્થન
વર્લ્ડ હેલ્થ ઓર્ગેનાઈઝેશને હોસ્પિટલમાં ભરતી કોવિડ-19ના દર્દીઓ પર રેમડેસિવિરનો ઉપયોગ ન કરવાની સલાહ આપી હતી પરંતુ શહેરના ડોક્ટર્સ આ ડ્રગના ઉપયોગનું સમર્થન કરી રહ્યા છે. વર્લ્ડ હેલ્થ ઓર્ગેનાઈઝેશન ભલામણ કરી છે કે હાલમાં એવા કોઈ પૂરાવા નથી કે રેમડેસિવિર કોરોનાના ગંભીર લક્ષણો ધરાવતા દર્દીઓ પર અસરકારક રહી છે. જોકે, ડોક્ટર્સનું કહેવું છે કે, તેમને દર્દીઓ પર રેમડેસિવિરનો ઉપયોગ કર્યો ત્યારબાદ તેમને ઘણા સારા પરિણામ જોવા મળ્યા છે. એપોલો હોસ્પિટલના ક્રિટિકલ કેર સ્પેશિયાલિસ્ટ ડોક્ટર મહર્ષી દેસાઈએ જણાવ્યું હતું કે, હાલમાં અમારા કોરોનાના દર્દીઓમાં 80 ટકા દર્દીઓ 50 વર્ષથી વધુ વયના છે. જેમાં ઘણા લોકોને અગાઉથી કેટલાક રોગો છે.
રેમડેસિવિરથી ઘણા લોકોના જીવ બચ્યા છે
એએચએનએ સેક્રેટરી ડોક્ટર વિરેન શાહે જણાવ્યું હતું કે, અમે સારવાર માટે રેમડેસિવિરનો ઉપયોગ કરી રહ્યા છીએ. કોરોનાની સારવારમાં રેમડેસિવિર સારા પરિણામો આપી રહ્યું છે અને ઘણા લોકોના જીવ બચાવ્યા છે. તેનાથી ટોસિલિઝુમાબના ઉપયોગમાં પણ ઘટાડો થયો છે. આ દવાની તંગીની શક્યતાને લઈને ડોક્ટર શાહે જણાવ્યું હતું કે, જો કોરોનાના કેસ આ જ ગતિથી વધતા રહ્યા તો આ દવાની તંગી સર્જાવાની શક્યતા પૂરેપૂરી છે. થોડા મહિના પહેલા આપણે આ જ પરિસ્થિતિનો સામનો કર્યો હતો જ્યારે શહેરમાં કોરોના તેની ટોચ પર હતો.
આગામી દિવસોમાં આ દવાની તંગી સર્જાય તેવી શક્યતા
કેમિસ્ટ્સે પણ રેમડેસિવિરની તંગી અંગે ચિંતા વ્યક્ત કરી છે. ગુજરાત કેમિસ્ટ એસોસિયેશનના ચેરમેન જશવંત પટેલે જણાવ્યું હતું કે, કોરોનાની ગંભીર સ્થિતિ ધરાવતા અને અગાઉથી બીમારી ધરાવતા કોરોનાના દર્દીઓની સંખ્યા વધવાના કારણે હોસ્પિટલોએ રેમડેસિવિરના ઓર્ડર વધારી દીધા છે. જો આ રીતે કેસ વધતા રહ્યા તો આગામી દિવસોમાં રેમડેસિવિરની તંગી સર્જાઈ શકે છે.