તમારી પાસે પણ ક્યાંક 200ની નકલી નોટ નથી આવી ને? 17 બેંકમાં જમા થઈ નકલી નોટો

I am Gujarat

200ની નકલી નોટો ફરતી થઈ

અમદાવાદ: હજુ તો 200ની નોટને ચલણમાં આવ્યાને માંડ એક વર્ષ જેટલો સમય થયો ત્યાં જ 200ની નકલી નોટો બજારમાં ફરતી થઈ છે. અમદાવાદ SOG (સ્પેશિયલ ઓપરેશન ગ્રુપ) દ્વારા નોંધવામાં આવેલી ફરિયાદ પ્રમાણે, શહેરની 17 બેંકોમાં છેલ્લા 3 મહિનામાં 3,751 નકલી નોટો જમા થઈ છે.

બેંકોમાં જમા થઈ નકલી નોટો

એક સીનિયર SOG અધિકારીના જણાવ્યા પ્રમાણે, દર ત્રણ મહિને બેંકો SOGમાં નકલી નોટો અંગેની ફરિયાદ નોંધાવે છે. જો કે આ મામલે કોઈ ધરપકડ થતી નથી કારણકે નકલી નોટો કોણ જમા કરાવી ગયું તે અંગે બેંકો પાસે કોઈ પુરાવા નથી હોતા. SOGના સૂત્રોના જણાવ્યા મુજબ, 200ની 25, 2000ની 213, 500ની 251, 100ની 2,142, 50 રૂપિયાની 180, 20 રૂપિયાની 9 અને 10 રૂપિયાની 22 નકલી નોટો રિકવર થઈ છે. કુલ મળીને 3,751 નકલી નોટોની કિંમત 15,04,360 રૂપિયા થાય છે.

SOG કરી રહી છે તપાસ

SOGના સૂત્રોએ જણાવ્યું કે, નોટબંધી પછી પણ નકલી નોટો સર્ક્યુલેશનમાં છે. નકલી નોટો બેંકોમાં જમા થાય છે. સીનિયર SOG ઓફિસરે કહ્યું કે, “નકલી નોટો જમા કરાવનારા શખ્સોની ઓળખ માટે અમે CCTV ફૂટેજ મંગાવ્યા છે. અમે બેંકોને પણ સૂચન કર્યું છે કે ડિપોઝિટર્સ પાસેથી નોટો જમા લેતી વખતે સાવચેત રહેવું.”