અમદાવાદ: અમદાવાદ હોસ્પિટલ્સ એન્ડ નર્સિંગ હોમ્સ અસોસિએશનની (AHNA) ઓફિશિયલ વેબસાઈટના રવિવાર સાંજ સુધીના આંકડા મુજબ, શહેરમાં રહેલી 63 કોવિડ-19 પ્રાઈવેટ હોસ્પિટલોમાં 362 ICU બેડ્સમાંથી 218 બેડમાં દર્દીઓ છે, જ્યારે 144 બેડ્સ હાલ ખાલી છે. આમ શહેરમાં ICU બેડ્સની ઓક્યુપન્સી રેટ 60 ટકા થાય છે. જ્યારે વેન્ટીલેટર સાથેના 122 ICU બેડ્સમાં 86માં દર્દીઓ છે, જેની ઓક્યુપન્સી રેટ 70.6 ટકા થાય છે.
શહેરના એક એક્સપર્ટે જણાવ્યું કે, ઓગસ્ટ મહિનાની શરૂઆતથી જ અમદાવાદ જિલ્લામાં એવરેજ રોજના 153 કેસ આવી રહ્યા છે. જોકે ICUની સારવારની જરૂર હોય તેવા દર્દીઓમાં વધારો થઈ રહ્યો છે. AHNAના અધિકારીઓ જણાવી રહ્યા છે કે શહેર ટોચની 4 કોવિડ-19 કેર હોસ્પિટલોમાં ICU વેન્ટિલેટરની કેપેસિટી 40 છે. 27 જુલાઈથી 31 જુલાઈ સુધી ડેઈલી ઓક્યુપન્સી રેટ 40માંથી 34થી 36 વચ્ચે રહ્યો હતો.
AHNAના પ્રેસિડેન્ટ ડોક્ટર ભરત ગઢવી કહે છે, શરૂઆતની સરખામણીમાં પ્રાઈવેટ હોસ્પિટલોમાં ICUની સુવિધાની જરૂર પડે તેવા કોરોનાના દર્દીઓ ઝડપથી વધી રહ્યા છે. તેમણે કહ્યું, કેટલાક દર્દીઓની હાલત સ્થિર થતા પહેલા લાંબા ICU સ્ટેની જરૂર પડે છે અને બાદમાં તેમને જનરલ વોર્ડમાં શિફ્ટ કરી શકાય છે. જ્યારે સારી વાત તે છે કે નવા ટ્રિટમેન્ટ પ્રોટોકોલના કારણે ગંભીર દર્દીઓનો પણ મૃત્યુદર નીચે જઈ રહ્યો છે.
આ બાબત સ્વાસ્થ્ય વિભાગના આંકડામાં પણ જોવા મળે છે. કોવિડ-19ના રોજના બુલેટિન મુજબ, વેન્ટીલેટર પરના પોઝિટિવ દર્દીઓની સંખ્યા મે મહિનામાં 46 હતી, જે જૂનમાં 65 થઈ, બાદમાં જુલાઈમાં તે 72 થઈ અને ઓગસ્ટના 9 દિવસમાં વધીને 81 થઈ ગઈ છે.