સામુહિક દુષ્કર્મ અને વારંવાર દુષ્કર્મની ઘટનાઓ પાછલા એક વર્ષમાં ડબલ થઈઃ NCRB

અમદાવાદઃ દેશમાં મહિલાઓ વિરુદ્ધ ગુનામાં 2018ની તુલનાએ 2019માં ખૂબ જ મોટો વધારો જોવા મળ્યો છે. 2019માં દુષ્કર્મ પીડિતાઓની સંખ્યમાં વધારો થયો છે જેમણે કહ્યું હોય કે તેમની સાથે એક જ વ્યક્તિ દ્વારા એકથી વધુવાર દુષ્કર્મ આચરવામાં આવ્યું છે. નેશનલ ક્રાઈમ રેકોર્ડ્સ બ્યુરો(NCRB) દ્વારા 'ક્રાઈમ ઇન ઇન્ડિયા 2019' રિપોર્ટ રજૂ કરવામાં આવ્યો છે જેમાં આ અંગે ખુલાસો થયો છે. 2018ના રિપોર્ટમાં આવા પ્રકારના કેસની સંખ્યા 30 હતી જે 2019માં વધીને 62 પહોંચી ગઈ છે. તો સામુહિત દુષ્કર્મના કેસની સંખ્યામાં પણ 2018ના 7થી વધીને 2019માં 14 થઈ ગઈ છે.

દુષ્કર્મની ઘટનાઓનું એનાલિસિસ જણાવે છેકે 96.4 ટકા પીડિતા તેની સાથે આ ઘૃણાસ્પદ કૃત્યુ આચરનારને ઓળખતી હતી. આ ઘટનાઓમાં એક પીડિતા સાથે જ્યારે દુષ્કર્મ આચરવામાં આવ્યું ત્યારે તે ગર્ભવતી હતી જ્યારે 4 પીડિતા શારીરિક કે માનસીક અસ્વસ્થ હોવાનું સામે આવ્યું છે.


ગુજરાતના બે મુખ્ય શહેરો સુરત અને અમદાવાદમાં મહિલાઓ વિરુદ્ધ ગુનામાં સતત વધારો જોવા મળી રહ્યો છે. સુરતમાં મહિલાઓ વિરુદ્ધ ગુનામાં એક જ વર્ષમાં 42 ટકાનો વધારો આવ્યો છે. 2018માં સુરતમાં 712 કેસ નોંધાયા હતા જેની સામે 2019માં સુરતમાં 1015 કેસ નોંધાયા છે. જ્યારે અમદાવાદમાં પણ 2018ના 1416 કેસની સામે 2019માં 15 ટકા વધારે કેસ સાથે 1633 કુલ ગુના નોંધાયા છે. જો તુલનાત્મક વાત કરવામાં આવે તો ગુજરાતમાં IPC, સ્પેશિયલ કાયદા અને લોકલ કાયદા હેઠળ નોંધાયેલા ગુનાઓમાં એક વર્ષમાં કુલ મળીને 5.6 ટકાનો વધારો થયો છે.

અમદાવાદમાં દુષ્કર્મની ઘટનામાં 22 ટકાનો વધારો થયો છે. જેમાં 2018ના 68 કેસની સામે 2019માં 83 કેસ નોંધાયા છે. જ્યારે સુરતમાં આ મામલે 8.7 ટકાનો ઘટાડનો નોંધાયો છે. અહીં 2018ના 46 કેસની સામે 2019માં ઘટીને 42 કેસ નોંધાયા છે.

રાજ્યમાં બાળકો વિરુદ્ધના ગુનામાં પણ વધારો નોંધાયો છે. રાજ્યમાં પ્રોટેક્શન ઓફ ચાઈલ્ડ ફ્રોમ સેક્સ્યુઅલ ઓફેન્સ(પોક્સો) એક્ટ હેઠળ નોંધાયેલા ગુનામાં વાર્ષિક 5 ટકાનો વધારો નોંધાયો છે. 2019માં કુલ 2227 કેસ પોક્સો હેઠળ નોંધાયા છે જેમાં 1539 કેસ દુષ્કર્મ, 337 કેસ સેક્સ્યુઅલ એસોલ્ટ, 258 કેસ શારીરિક છેડછાડ અને 9 કેસ ચાઇલ્ડ પોર્નોગ્રાફીના છે.

જ્યારે રાજ્ય પોલીસ વિભાગના ડેટા મુજબ જુલાઈ 2020 સુધીમાં આ વર્ષે 307 જેટલા દુષ્કર્મ કેસ નોંધાયા છે. જેને જો માસિક ડેટમાં જોવામાં આવે તો મહિને અંદાજીત 44 દુષ્કર્મના કેસ રાજ્યમાં નોંધાય છે. આ ડેટા 2019ના ડેટા બરોબર છે.