કોંગ્રેસનો આક્ષેપ, ગુજરાતમાં 25 હજાર કરોડનું પાક વીમા કૌભાંડ થયું

અમદાવાદ: ગુજરાતમાં રાફેલ કરતા પણ મોટું પાક વીમા કૌભાંડ થયું હોવાનો આક્ષેપ કોંગ્રેસ દ્વારા કરવામાં આવ્યો છે. ગુજરાત પ્રદેશ કોંગ્રેસના પ્રમુખ અમિત ચાવડાએ આજે એક પ્રેસ કોન્ફરન્સ યોજી આ આરોપ લગાવ્યો હતો. પાક વીમામાં 20થી 25 હજાર કરોડનું કૌભાંડ થયાનો કોંગ્રેસે આરોપ લગાવ્યો હતો. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો: https://t.me/iamgujaratofficial કોંગ્રેસના નેતા પાલ આંબલિયાએ પ્રેસ કોન્ફરન્સમાં પાક વીમાનું ગણિત સમજાવતા કહ્યું હતું કે, ખેડૂતોને 91.547 ટકા પાક વીમો મળવા પાત્ર છે જેમાંથી માત્ર 1.48 ટકા પાક વીમો મળે છે. તેમણે જણાવ્યું હતું કે, ‘પ્રધાનમંત્રી પાક વીમા યોજના’ની કલમમાં સ્પષ્ટ જોગવાઈઓ છે. જેમાં એપમાં ઘણી વસ્તુઓ અપલોડ કરવામાં આવે છે. પરંતુ, હાલ આ એપને બાજુ પર મૂકી દેવામાં આવી છે. જો ખેતીના આંકડા તેમાંથી લેવામાં આવે તો સ્પષ્ટ આંકડા મળે છે, પરંતુ એપને બાજુએ મૂકી દેવાતા તેમાંથી કોઈ આંકડા સ્પષ્ટ થતા નથી. જેથી તાલુકા અને જિલ્લા કક્ષાના માધ્યમથી આંકડા મંગાવવામાં આવે છે અને તેમાં ઘણી જ ગેરરીતિઓ થાય છે. કોંગ્રેસે આરોપ લગાવ્યો કે, વીમા કંપનીઓ ખેડૂતો સાથે ગોલમાલ કરે છે. પાક વીમામાં હેક્ટર દીઠ 61 હજાર રૂપિયાની ગોલમાલ થઈ છે. જેના કારણે સમગ્ર રાજ્યમાં વીમા કંપનીઓએ કરોડો રૂપિયાનું કૌભાંડ આચર્યું છે. કોંગ્રેસે કહ્યું કે, પાક વીમા પ્રક્રિયામાં પારદર્શકતા નથી. આંકડા ફેરબદલ કરીને કૌભાંડ આચર્યું છે. આ પ્રક્રિયામાં RTI કરીએ તો પણ સાચી માહિતી મળે તેમ નથી. પાક વીમા કૌભાંડ રાફેલ કરતા પણ મોટું હોવાનો આરોપ લગાવતા કોંગ્રેસે કહ્યું કે, ખેતીભવનના અધિકારીઓ આંકડાઓની ગોલમાલ કરીને વીમા કંપનીઓને ફાયદો કરાવે છે. જેથી કોંગ્રેસ સરકાર સમક્ષ ખેડૂતોને AY અને TYના પત્રક આપવા માગ કરી છે. વીમા કંપનીઓને મુખ્યમંત્રી અને કૃષિમંત્રી છાવરી રહ્યા હોવાનો સીધો આક્ષેપ પણ કોંગ્રેસે કર્યો છે.