દીકરીઓએ બ્રેન ડેડ માતાના અંગોનું દાન કરીને એક બાળક સહિત ત્રણને આપ્યું નવું જીવન

અમદાવાદ: સિવિલ હોસ્પિટલમાં એક હૃદયસ્પર્શી ઘટના બની છે. ત્રણ પુત્રીઓએ મળીને 'અંગદાન એ જ મહાદાન'ના મંત્રને સાર્થક કર્યો છે. દીકરીઓએ માતાના અંગોનું દાન કરીને તેમને કાયમ માટે યાદોમાં જીવંત રાખ્યા છે. અંગદાન દ્વારા મદદ મળતાં ત્રણ દર્દીઓના જીવનમાં પણ સ્મિત રેલાયું છે.

ઘાટલોડિયામાં રહેતા મીનાબેનના પરિવારમાં ત્રણ પુત્રી અને બે પુત્ર છે. 48 વર્ષીય મીનાબેન ઝાલાને 19 જાન્યુઆરી 2021ના રોજ બ્રેન ડેડ જાહેર કરાયા હતા. જે બાદ તબીબોએ ગુજરાત સરકારના અંગદાન કાર્યક્રમ હેઠળ અંગદાન કરવા માટે મીનાબેનના પરિવારજનોને સમજાવ્યા હતા. મીનાબેનની દીકરીઓએ માતાની યાદોને ચિર સ્મરણીય બનાવવાનો નિર્ણય કર્યો હતો અને માતાના અંગોના પ્રત્યારોપણ માટે સહમતિ દર્શાવી હતી.

સામાન્ય રીતે અંગદાન જેવા કાર્યક્રમમાં અસમજણ અને અજ્ઞાનના કારણે પુરુષ પણ જે નિર્ણય લેવામાં ખચકાય છે તે નિર્ણય મીનાબેનની ત્રણેય દીકરીઓએ હિંમતપૂર્વક લીધો હતો. આ જ આપણા સમાજને સંદેશો આપે છે કે, દીકરીઓ દીકરાઓ કરતાં જરાય ઉતરતી નથી અને જરૂર પડ્યે દીકરાઓ કરતાં પણ વધુ મક્કમતાથી નિર્ણય લઈ શકે છે.

સ્વજનોએ સહમતિ આપ્યા બાદ અમદાવાદ સિવિલના નવનિર્મિત ટ્રોમા સેન્ટર ખાતે અંગોને રિટ્રાઈવ કરીને પ્રત્યારોપણ દ્વારા ત્રણ લોકોને નવી જિંદગી મળી હતી. મીનાબેનના લિવરનું જામનગરના 15 વર્ષના બાળકમાં અને બંને કિડનીનું સુરેન્દ્રનગરના 30 અને 35 વર્ષના બે વ્યક્તિઓમાં પ્રત્યારોપણ કરવામાં આવ્યું હતું. આમ મીનાબેનના અંગો દ્વારા કુલ ત્રણ લોકોને નવી જિંદગી મળી હતી.

સિવિલ હોસ્પિટલની સમગ્ર ટીમ દ્વારા અંગદાનની શ્રેષ્ઠ કામગીરી કરવામાં આવી રહી છે. સિનિયર તબીબો અને કાઉન્સિલરો દ્વારા દર્દીઓના સગાંને અંગદાન માટે પ્રેરવાના તમામ પ્રયત્નો કરવામાં આવે છે જેમાં સિવિલ હોસ્પિટલને જ્વલંત સફળતા મળી છે. ફક્ત એક મહિનાના ટૂંકા ગાળામાં 3 બ્રેન ડેડ દર્દીના પરિવારજનોએ અંગદાન માટે સંમતિ દર્શાવી હતી. આ અંગદાન દ્વારા સાત લોકોના જીવ બચાવી શકાયા હતા.