એપોઈન્ટમેન્ટમાં વિલંબથી ધૂંધળું બની શકે છે તમારું યુરોપના મલ્ટી-યર વિઝાનું સપનું

અનુભવી પ્રવાસીઓ અથવા તો યુરોપના સુંદર દેશોમાં ફરવાનો શોખ ધરાવતા લોકો માટે પાંચ વર્ષ સુધીના મલ્ટીયર વિઝા મેળવવા એક સ્વપ્ન સાકાર થવા બરાબર હોય છે. જોકે, યુરોપિયન યુનિયન (EU) દ્વારા તાજેતરની જાહેરાતોથી ઘણા ટ્રાવેલર્સને અસમંજસની સ્થિતિમાં મૂકી દીધા છે. લાંબા ગાળાના વિઝાની લાલચ હોવા છતાં એપોઈન્ટમેન્ટમાં વિલંબના કારણે યુરોપમાં ઉનાળાની રજાઓનો આનંદ માણવા જવા ઈચ્છતાં લોકોની મજા બગડી શકે છે. આ અંગે સ્પષ્ટતા કરતાં ટૂરિઝમ ડેવલપમેન્ટ સોસાયટી (ગુજરાત)ના ચેરમેન મનીષ શર્માએ જણાવ્યું હતું કે, શેન્ગેન દેશો માટે વિઝા એપોઈન્ટમેન્ટની ઉપલબ્ધતા ચિંતાનો વિષય છે. લોકો જ્યાં જવા ઈચ્છે છે તે સિવાયના દેશમાં એપોઈન્ટમેન્ટ મેળવવી એ નવા વિઝા પ્રસ્તાવના હેતુને મારીને મુસાફરીનો સમય વધારે છે. મોટાભાગના પ્રવાસીઓ જેઓ વેકેશનમાં વિદેશ પ્રવાસ કરવા ઈચ્છે છે તેઓ બે મહિના કરતાં વધુ અગાઉથી તેમની ટ્રિપ્સનું આયોજન અને બુકિંગ કરે છે.

યુરોપના વિઝાના આ પડકારોના કારણે ટ્રાવેલ કંપનીઓનો અંદાજ છે કે જે લોકો ઉનાળાનું વેકેશન માણવા માટે યુરોપ જવા ઈચ્છતાં હતા તેમાંથી નોંધપાત્ર લોકોએ હવે યુરોપ જવાનું માંડી વાળ્યું છે. આ લોકોએ હવે યુરોપના બદલે દક્ષિણપૂર્વ એશિયા અને તેનાથી આગળના સ્થળોની પસંદગી કરી છે. અમદાવાદ સ્થિત ટ્રાવેલ કંપનીના માલિક અંકિત બજાજે જણાવ્યું હતું કે, વિઝા-ઓન-અરાઈવલ વિકલ્પો અને ડાયરેક્ટ એર કનેક્ટિવિટી સાથે દક્ષિણપૂર્વ એશિયાના દેશોમાં જવું વધારે સરળ રહે છે. વિદેશમાં ઉનાળાનું વેકેશન માણવા ઈચ્છતા લોકો માટે આવા દેશો આકર્ષક વિકલ્પો તરીકે ઉભરી આવ્યા છે. અમે એકલા ગુજરાતમાંથી ઓછામાં ઓછા 50% પ્રવાસીઓને જોયા છે જેમણે તેમની ટ્રિપ્સને યુરોપના બદલે અન્ય દેશો તરફ વાળી છે. કારણ કે તેઓ છેલ્લી ઘડીના વિલંબ અને કેન્સલેશનની ઝંઝટથી બચવા માગે છે.

વિલંબ ઉપરાંત શેંગેન વિઝાનો રિજેક્શન રેશિયો પણ ઊંચો છે. શેંગેન દેશો માટે વિઝા અરજી પ્રક્રિયાને સુવ્યવસ્થિત કરવામાં અને બેકલોગને ઘટાડવામાં નિષ્ફળતા સંભવિત ટૂરિસ્ટના નોંધપાત્ર હિસ્સાને ત્યાં જતાં રોકશે અને પીક ટ્રાવેલ સીઝન દરમિયાન યુરોપીયન સ્થળોના આકર્ષણમાં ઘટાડો કરશે, તેમ બજાજે જણાવ્યું હતું. ફક્ત બિઝનેસ માટે વારંવાર યુરોપિયન યુનિયનના દેશોમાં ટ્રાવેલ કરતાં લોકો લાંબા ગાળાની વિઝા દરખાસ્તોનો લાભ મેળવે છે. ટ્રાવેલ એજન્ટ્સ એસોસિએશન ઓફ ઈન્ડિયા (TAAI) ગુજરાતના ચેરમેન વીરેન્દ્ર શાહે જણાવ્યું હતું કે, આ પહેલ અનુભવી પ્રવાસીઓને ફાયદો પહોંચાડી શકે છે.