ફેન્સી નંબરની હરાજી: શોખીનોએ 9 નંબર 1.94 લાખ તો 111 નંબર 1.30 લાખમાં ખરીદ્યો

અમદાવાદ: અમદાવાદ આરટીઓ ખાતે કારની હાલની સિરીધ GJ-01-WA પૂર્ણ થતાં તાજેતરમાં નવી સિરીઝ GJ-01-WB શરૂ કરવાની આવી હતી. આ સિરીઝમા માટે ઈ-ઓક્શન કરવામાં આવતા પસંદગીના નંબર લેવા માટે વાહન માલિકોએ વાહનનું રજિસ્ટ્રેશન કરાવ્યું હતું. મળતી માહિતી પ્રમાણે 125 જેટલા અરજદારોએ પંસદગીનો નંબર મેળવવા માટે અરજી કરી હતી. ઈ-ઓક્શનમાં 9 નંબર માટે સૌથી વધુ 1.94 લાખ જ્યારે 111 નંબર માટે 1.30 લાખ જેટલી ઊંચી બોલી લગાવીને શોખીનોએ પસંદગીનો નંબર ખરીદ્યો હતો.

લકી ગણાતા 9 નંબર માટે સૌથી ઊંચી 1.94 લાખની બોલી લગાવાઈ
મળતી માહિતી પ્રમાણે નવી સિરીઝના નંબર માટે 13 જાન્યુઆરીથી 15 જાન્યુઆરી દરમિયાન રજિસ્ટ્રેશનની કામગીરી ચાલી હતી. જેમાં 125 જેટલા લોકોએ પસંદગીનો નંબર ખરીદવા માટે અરજી કરી હતી. જેમાં મોટાભાગના કિસ્સામાં એક જ અરજદારે પસંદગીનો નંબર મેળવવા માટે રસ દાખવતા તેમની પાસેથી નિયત ફી લઈને તેમને નંબર ફાળવી દેવાયો હતો. જો કે, અમુક નંબરમાં એક કરતા વધારે અરજદારો હોવાથી તે નંબર માટે હરાજી થઈ હતી. જેમાં લકી ગણાતા 9 નંબર માટે એક કરતા વધુ અરજદારો હોવાથી ઈ-ઓક્શન કરવામાં આવ્યું હતું અને છેવટે સુખદેવ વાઘેલા નામના વ્યક્તિએ સૌથી વધારે 1.94 લાખની બોલી લગાવતા નંબર તેમને ફાળવી દેવાયો હતો.

111 નંબર 1.30 લાખ રૂપિયામાં ખરીદ્યો
આ જ રીતે, 111 નંબર માટે પણ એક કરતા વઘારે અરજદારો હોવાથી તેના માટે પણ માટે બોલી લગાવાઈ હતી, અને છેવટે 1.30 લાખમાં આ નંબર અજય નામના વ્યક્તિએ ખરીદ્યો હતો. તેમજ 2070 માટે પણ એક કરતા વધુ અરજદાર હોવાથી તેની પણ બોલી લાગી હતી અને તે નંબર 11 હજાર રૂપિયામાં વેચાયો હતો.

કયો નબર કેટલામાં વેચાયો
અમદાવાદ RTOમાં કારની નવી સિરીઝ ખુલતા ઈ-ઓક્શન થયું હતું. જેમાં 9 નંબર માટે સૌથી વધુ બોલી લગાડતા 1.94 લાખમાં વેચાયો હતો. આ ઉપરાંત 111 નંબર 1.30 લાખમાં, 2070 નંબર 11 હજારમાં, 5554 નંબર 8 હજારમાં જ્યારે 1, 5, 7, 999, 7777, 8888 તેની બેઝ પ્રાઈસ 25000 રૂપિયામાં વેચાયા હતા. આમ કારની નવી સિરીઝ માટે ઈ-ઓક્શન રાખીને 125 જેટલા પસંદગીના નંબરો અરજદારને ફાળવવામાં આવ્યા હતા.