સ્થાનિક સ્વરાજ્યની ચૂંટણીની તારીખ જાહેર, 21 ફેબ્રુઆરીએ મનપા માટે થશે મતદાન

ગુજરાતની સ્થાનિક સ્વરાજ્યની ચૂંટણીની તારીખો જાહેર કરવામાં આવી છે. કોરોના વાયરસની પરિસ્થિતિને ધ્યાનમાં રાખતા આ ચૂંટણી બે તબક્કામાં યોજાશે. પ્રથમ તબક્કામાં મહાનગરપાલિકા અને બીજા તબક્કામાં નગરપાલિકા અને પંચાયતોની ચૂંટણી યોજાશે. છ મહાનગરપાલિકાઓ માટે 21 ફેબ્રુઆરીએ મતદાન યોજાશે અને 23મી ફેબ્રુઆરીએ મતગણતરી કરવામાં આવશે. 31 જિલ્લા પંચાયતો અને 231 તાલુકા પંચાયતો તથા 81 નગરપાલિકાઓ માટે 28 ફેબ્રુઆરીએ મતદાન થશે જેની મતગણતરી બીજી માર્ચે કરવામાં આવશે.

ચૂંટણી દરમિયાન કોરોનાના નિયમોનું પાલન થાય તે માટે વ્યવસ્થા કરવામાં આવશે. આ ચૂંટણીને ધ્યાનમાં રાખીને ચૂંટણી પંચ દ્વારા તમામ જિલ્લા કલેક્ટરો સાથે વિડીયો કોન્ફરન્સ દ્વારા એક સમીક્ષા બેઠક યોજાઈ હતી જેમાં કોરોનાકાળ વચ્ચે ચૂંટણી યોજાવાની હોવાથી મતદાન મથકોએ ચૂંટણી સ્ટાફ તથા પોલીસને ફેસશિલ્ડ, સેનિટાઈજર તથા માસ્ક પૂરા પાડવામાં આવશે.

મતદાન મથકોએ પણ મતદારો માટે સેનિટાઈઝરની વ્યવસ્થા કરવામાં આવશે. કોરોનાનો ચેપ ન ફેલાય તેની તકેદારીના ભાગ રૂપે માસ્ક અને સેનિટાઈઝર જેવી વ્યવસ્થા પર વધારે ભાર મૂકવામાં આવ્યો હતો.
મહાનગરપાલિકા માટે ઉમેદવારી પત્ર ભરવાની છેલ્લી તારીખ છઠ્ઠી ફેબ્રુઆરી છે જ્યારે નગરપાલિકા અને પંચાયતની ચૂંટણી માટે 13 ફેબ્રુઆરી છે. મહાનગરપાલિકા, નગરપાલિકા, જિલ્લા-તાલુકા પંચાયતો અને અન્ય સ્વરાજ્યના એકમોની ખાલી પડેલી બેઠકોની પેટાચૂંટણી હેઠળના વિસ્તારમાં 23 જાન્યુઆરીના રોજ ચૂંટણીઓની જાહેરાત થતાં ચૂંટણીની આદર્શ આચારસંહિતા અમલમાં આવશે.