રાજ્યમાં વધુ એક પેપર ફૂટ્યું! જૂનિયર ક્લાર્કની પરીક્ષા મોકૂફ, નવ લાખથી વધારે ઉમેદવારોની મહેનત પાણીમાં

પાછલા ઘણાં સમયથી ગુજરાત રાજ્યમાં સ્પર્ધાત્મક પરીક્ષાઓના પેપર ફૂટી જવાની સમસ્યા સામાન્ય બની ગઈ છે. આજ રોજ જૂનિયર ક્લાર્કની પરીક્ષાનું આયોજન કરવામાં આવ્યુ હતું, પરંતુ તે પેપર પણ ફૂટી જવાને કારણે પરીક્ષા મોકૂફ રાખવાનો નિર્ણય લેવામાં આવ્યો છે. પ્રાપ્ત જાણકારી અનુસાર, સમગ્ર મામલામાં અત્યાર સુધી એક શંકાસ્પદ વ્યક્તિની ધરપકડ કરવામાં આવી છે. તમને જણાવી દઈએ કે આજે 9 લાખથી વધારે ઉમેદવારો આ પરીક્ષા આપવાના હતા.

પ્રાપ્ત જાણકારી અનુસાર, પોલીસને મળેલી બાતમીના આધાર એક વ્યક્તિની ધરપકડ કરવામાં આવી છે. પૂછપરછ કરતા તેની પાસેથી પેપરની નકલ મળી હોવાની જાણકારી પણ સામે આવી છે. પોલીસ તંત્ર દ્વારા આ બાબતે કાયદેસરની કાર્યવાહી શરુ કરવામાં આવી છે. ગુજરાત પંચાયત સેવા પસંદગી મંડળ દ્વારા નિવેદન જાહેર કરવામાં આવ્યું છે કે, ઉમેદવારોના હિતને ધ્યાનમાં રાખીને આજે સવારે 11 વાગ્યે જે પરીક્ષા યોજાવાની હતી તેને મોકૂફ રાખવાનો નિર્ણય લેવામાં આવ્યો છે.ઉલ્લેખનીય છે કે, રાજ્યના તમામ જિલ્લાઓમાં જૂનિયર ક્લાર્કની પરીક્ષાનું આયોજન થવાનુ હતું. 1181 બેઠકો માટે આ ભરતીનું આયોજન કરવામાં આવ્યુ હતું, જેની સામે નવ લાખથી વધારે ઉમેદવારોએ નોંધણી કરાવી હતી. મંડળ દ્વારા પોતાના નિવેદનમાં કહેવામાં આવ્યું છે કે, પરીક્ષા નવેસરથી વહેલી તકે યોજવામાં આવશે અને તેની વિગતવાર માહિતી મંડળ દ્વારા ટૂંક સમયમાં જાહેર કરવામાં આવશે.

ઉલ્લેખનીય છે કે વર્ષ 2018માં આ પરીક્ષા મોકૂફ રાખવામાં આવી હતી. કોરોના કાળના બે વર્ષ અને ત્યારપછી પણ લાંબા સમય પછી રાજ્યમાં સ્પર્ધાત્મક પરીક્ષાનું આયોજન કરવામાં આવ્યુ હતું. 7500 પોલીસકર્મીઓ અને 70,000 પરીક્ષા સ્ટાફ તૈનાત કરવામાં આવ્યો હતો. તમામ કેન્દ્રો સીસીટીવી કેમેરાથી સજ્જ હતા. ઉમેદવારોને પણ પેન, આઈકાર્ડ અને એક્ઝામ રિસિપ્ટ સિવાય કોઈ પણ વસ્તુ લઈ જવાની મનાઈ હતી. આટલી વ્યવસ્થા પછી આ પ્રકારે પેપર ફૂટવાને કારણે વિદ્યાર્થીઓ ચોક્કસપણે નિરાશ થયા હતા.