અમદાવાદ: રેવડી બજાર સ્થિત કામધેનૂ માર્કેટના ભોયરામાં ફાટી નીકળી ભીષણ આગ

અમદાવાદ: કાલુપુરમાં રેવડી બજાર સ્થિત કામધેનૂ માર્કેટના ભોયરામાં ભીષણ આગ ફાટી નીકળતા અફરાતફરી મચી ગઈ. બનાવની જાણ થતાં 10થી વધુ ફાયર ફાઈટર ઘટનાસ્થળે આગને કાબૂ મેળવવાનો પ્રયાસ કર્યો હતો અને કલાકોની જહેમત બાદ આગ પર કાબૂ મેળવાયો હતો. મળતી માહિતી પ્રમાણે આગ એટલી ભયાનક હતી કે બ્રિગેડ કોલ જાહેર કરવામાં આવ્યો હતો અને નજીકના તમામ ફાયર સ્ટેશન એલર્ટ કરી દેવામાં આવ્યા હતા. ઘટનામાં 50 જેટલા લોકોનું પણ રેસ્ક્યું કરવામાં આવ્યું છે. આગમાં કોઈને જાનહાની થઈ હોવાના હજી સુધી જાણકારી મળી નથી.
પ્રાપ્ત માહિતી અનુસાર ભોયરામાં આગ લાગતા અફરાતફરીનો માહોલ સર્જાયો હતો. આસપાસના તમામ લોકો ઘટના સ્થળ પર એકઠા થઈ ગયા હતા. જે બાદ સ્થાનિકો દ્વારા ફાયર વિભાગને ઘટના અંગે જાણ કરવામાં આવી હતી. મીડિયા રિપોર્ટ અનુસાર 10થી વધુ ગાડીઓ સ્થળ પર દોડી આવી હતી. નોંધનીય છે કે, કાપડ માર્કેટ હોવાથી આગ વધુ ન ફેલાય તેથી દુકાનના માલિકો પણ ફફડી ગયા હતા. જો કે, ફાયરે પાણીનો મારો ચલાવીને આગ પર કાબૂ મેળવી લેતા બધાને હાશકારો થયો હતો.
ઉલ્લેખનીય છે કે, અમદાવાદના રેવડી બજાર વિસ્તાર વેપાર અર્થે ધમધમતો રહેતો હોય છે. આ વિસ્તારમાં કપડાની દુકાનો સહિતની અનેક દુકાનો આવેલી છે. અહીં મોટા પ્રમાણમાં ગ્રાહકોનો ધસારો જોવા મળે છે. એવામાં કામધેનું બિલ્ડિંગમાં આગ લાગતા દુકાનદારો સાથે ગ્રાહકોમાં પણ ભયનો માહોલ જોવા મળ્યો હતો જો કે, ભોયરામાં આગ કેવી રીતે લાગી તે અંગે કઈ ચોક્કસ માહિતી સામે આવી નથી.