PPE કિટ પહેરવાના કારણે કોરોના વોરિયર્સનું ઘટવા લાગ્યું વજન

કુલદીપ તિવારીઃ છ મહિના કરતાં વધારે સમયથી કોવિડ-19 હોસ્પિટલમાં ફરજ બજાવી રહેલા ડોક્ટરો PPE કિટ પહેરીને સતત દર્દીઓની સારવાર કરી રહ્યા છે. જ્યાં એક તરફ PPE કિટ તેમને વાયરલ ઈન્ફેક્શનથી સુરક્ષા આપે છે તો બીજી તરફ આ કિટ તેમને ખાતા-પીતા રોકે છે અને વધારે પરસેવાનું કારણ બને છે. જેના કારણે ફ્રંટલાઈન કોવિડ વોરિયર્સનું વજન ઘટવા લાગ્યું છે. અમારા સહયોગી અમદાવાદ મિરર સાથે કેટલાક ફ્રંટલાઈન વોરિયર્સે આ અંગે પોતાના અનુભવ શેર કર્યા છે.


25 વર્ષની ડો. નિધિ કાપડીયા કે જે MD સાઈકિયાટ્રિકના બીજા વર્ષમાં અભ્યાસ કરે છે, તેણે જણાવ્યું હતું કે, 'કોરોના મહામારી શરુ થઈ ત્યારથી હું ડ્યૂટી પર છું. PPE કિટ પહેર્યા બાદ કોરોના ઈન્ફેક્શનને ટાળવા માટે અમે કંઈ ખાઈ-પી શકતા નથી. એપ્રિલથી જૂનના સમયગાળામાં એટલી ગરમી પડી કે અમે પીપીઈ કિટમાં કંટાળી જતા હતા. અમે પરસેવાથી નીતરી જતા હતા છતાં તેને કાઢી શકતા નહોતા. આ સિવાય દર્દીઓ સાથે ડીલ કરવાથી હું માનસિક રીતે થાકી ગઈ છું. દિવસ પૂરો થતાં અમે એટલા થાકી જઈએ છીએ કે જમવાના પણ હોશ રહેતા નથી. અમે તેથી ઊંઘી જઈએ છીએ. બદલાતી રહેતા શિફ્ટ ટાઈમે પણ મહત્વનો ભાગ ભજવ્યો. ઘણી વખત તો હું બપોરે અને સાંજે નહોતી જમી. સાત દિવસની ફરજ પછી અમને એક અઠવાડિયાનો વિરામ મળે છે, તેમ છતાં શિફ્ટ ઘણીવાર ભોજનના સમયમાં ખલેલ પહોંચાડે છે. એપ્રિલ પહેલા મારું વજન 75 કિલો હતું અને હવે ઘટીને 66 કિલો થઈ ગયું છે'.


મેડિકલ સર્વિસના હેડ ડો. અનુશ્રી પંડ્યાએ પોતાના અનુભવ જણાવતાં કહ્યું કે, 'હું દિવસના 8થી 10 કલાક કામ કરું છું. કોરોના મહામારી શરુ થઈ ત્યારથી મેં એક દિવસની પણ રજા લીધી નથી. ઉપરથી સ્ટાફ ઓછો છે. દર્દીઓનો ધસારો વધારે છે અને તેઓ ઝડપથી રિકવર થાય તેની ખાતરી કરવા માટે અમારે મેનેજ કરવું પડે છે. અમે અમારી નજરોની સામે લોકોને મૃત્યુ પામતા જોયા છે, જે અમારા માનસિક સ્વાસ્થ્યને પણ અસર કરે છે. ઉપરાંત PPE એટલે સતત પરસેવો થવો. જેના કારણે સ્કિન ઈન્ફેક્શન, અલ્સર, યુરિનરી ટ્રેક્ટ ઈન્ફેક્શન (UTI) થાય છે. લોકડાઉન પહેલા મારું વજન 58 કિલો હતું અને હવે ઘટીને 50 કિલો થઈ ગયું છે'.


પલ્મનરી એન્ડ ક્રિટિકલ કેર મેડિસિનના કન્સલ્ટન્ટ ડો. ભાગ્યેશ શાહે (ઉંમર 38) જણાવ્યું કે, 'મહામારી જ્યારે શરુ થઈ ત્યારે મારું વજન 88 કિલો હતું અને આજે મારું વજન 80 કિલો છે. વજન ઓછું થઈ જતાં હું ખુશ છું પરંતુ આ સામાન્ય રીતે થયું નથી અને આ ચિંતાનો વિષય છે. છેલ્લા 5-6 મહિનાથી અમે 8થી 10 કલાક માટે PPE કિટ પહેરીએ છીએ. PPE કિટ પહેરી હોય ત્યારે અમે પાણી પી શકતા નથી અથવા ભોજન લઈ શકતા નથી. મને કિડનીમાં પથરી છે તેથી નિયમિત પાણી પીવું મારા માટે જરૂરી છે. કિટ પહેર્યા પછી કેટલાક નિયમોનું પાલન કરવાનું હોવાથી મેં પાણી પીવા માટે તે મુજબનો પ્લાન બનાવ્યો છે. સવારમાં હું શક્ય એટલું વધારે પાણી લેવાનો પ્રયાસ કરું છું. જેથી હોસ્પિટલ પહોંચુ ત્ચાં સુધીમાં PPE કિટ પહેરતાં પહેલા પેશાબ દ્વારા તેને બહાર કાઢી શકું. કારણ કે કિટ પહેર્યા પછી અમે આરામરૂમમાં જઈ શકતાં નથી. તેવી જ રીતે, જ્યારે ઘરે પહોંચુ છું ત્યારે શક્ય એટલું વધારે પાણી લઉ છું. જેથી ઊંઘતા પહેલા તે ખાલી કરું શકું. અમારે સ્કિન ઈન્ફેક્શનનો સામનો પણ કરવો પડે છે'.


મેડિકલ અધિકારી ડો. ઉત્સવ પટેલે (ઉંમર 25) જણાવ્યું કે, 'હોસ્પિટલમાં બે મહિનાની કોવિડ ડ્યૂટી દરમિયાન મારું 18 કિલો વજન ઓછું થઈ ગયું. ઓગસ્ટની શરુઆત સુધી હું રેગ્યુલર ડ્યૂટી પર હતો અને મારું વજન તે સમયે 110 કિલો હતું. જો કે, ઓગસ્ટના ત્રીજા અઠવાડિયામાં કોવિડ ડ્યૂટી સોંપાયા બાદ મારું વજન અચાનક ઓછું થવા લાગ્યું. મારું હાલનું વજન 93 કિલો છે અને સતત ઘટી રહ્યું છે. મારી ડ્યૂટી સાંજે 8 વાગ્યે શરુ થાય છે અને સવારે 2 વાગ્યે ખતમ થાય છે. શિફ્ટ બાદ હું ભોજન પણ લઈ શકતો નથી. હું મોડો ઉઠુ છું અને ડાયરેક્ટ બપોરે જમું છું. દિવસમાં એકવાર જમવાની અને એકવાર કોફી પીવાની આદત પડી ગઈ છે. કોવિડ ડ્યૂટી દરમિયાન પણ જ્યારે અમને બ્રેક આપવામાં આવે છે ત્યારે ભૂખ મરી જતાં અમે જમી શકતા નથી. વધુમાં કોવિડ ડ્યૂટી શરુ થાય તે પહેલા અમારે પાણી પીવાનું બંધ કરી દેવુ પડે છે અને જ્યારે કિટમાં હોઈએ ત્યારે પણ પાણી લઈ શકતા નથી. મારા સહયોગીઓનું વજન પણ ઘટી ગયું છે. વજન ઉતર્યું તેનું દુઃખ નથી પરંતુ મને થાક અને નબળાઈ લાગે છે. તેથી મને મલ્ટિવિટામિન દવા લેવાની સલાહ આપવામાં આવી છે, જેનું સેવન હું કરી રહ્યો છું'.