જુઓ કેવી છે GMDC યુનિ. કન્વેન્શન સેન્ટર ખાતે તૈયાર કરેલી 900 બેડની હોસ્પિટલ

અમદાવાદઃ ગુજરાતમાં કોરોનાના કેસ વધી રહ્યા છે. જેમાં સૌથી વધુ ગંભીર સ્થિતિ અમદાવાદ અને સુરતમાં જોવા મળી રહી છે. હાઈકોર્ટમાં ગત અઠવાડિયે સરકારે કહ્યું હતું કે તેઓ GMDC મેદાન પાસે આવેલા યુનિવર્સિટી કન્વેશન્સ સેન્ટરમાં 900 બેડની હોસ્પિટલનું નિર્માણ 10 દિવસમાં કરશે. આ કોવિડ સેન્ટરને ખુબ જ ટુંકાગાળામાં DRDOના સહયોગથી તૈયાર કરી દેવામાં આવ્યું છે અને ખૂબ જ જલદી તેને શરૂ કરવામાં આવશે. ચર્ચા એવી પણ ચાલી રહી છે કે કેન્દ્રીય ગૃહમંત્રી અમિતશાહ 24 એપ્રિલે આ કોવિડ હોસ્પિટલનું ઉદ્ધાટન કરશે.


રાજ્ય સરકારના આરોગ્ય વિભાગ અને ગુજરાત યુનિવર્સિટીના સંયુક્ત પ્રયાસથી DRDOની મદદથી આ હોસ્પિટની મોટાભાગની કામગીરી પૂર્ણ થઈ છે. અમદાવાદમાં તૈયાર થયેલી આ 900 બેડની હોસ્પિટલ DRDOઓ દ્વારા તૈયાર કરેલી અત્યાર સુધીની સૌથી મોટી હોસ્પિટલ હશે.


યુનિવર્સિટી કન્વેશન્સ સેન્ટર ખાતે તૈયાર કરવામાં આવેલી હોસ્પિટલમાં 750 ઓક્સિજન બેડની સુવિધા તૈયાર કરવામાં આવી છે. જેના માટે 35 હજાર લીટર ક્ષમતાની ઓક્સિજન ટેન્ક પણ તૈયાર કરી દેવામાં આવી છે. આ ઉપરાંત 130થી વધુ વેન્ટિલેટર પણ મૂકવામાં આવ્યા છે. જેની મદદતી કોરોનાના ગંભીર દર્દીઓની સારવાર મળી રહે.


કોરોનાના કેસ વધતાં શહેરમાં હોસ્પિટલમાં બેડ પણ ખૂટી પડ્યાં છે, જેથી હવે કેન્દ્ર સરકારના DRDOના સહયોગથી રાજ્ય સરકાર દ્વારા અમદાવાદના ગુજરાત યુનિવર્સિટી ખાતેના કન્વેન્શન સેન્ટર ખાતે 900 બેડની હોસ્પિટલ શરૂ કરવામાં આવવાની છે. આ હોસ્પિટલમાં સ્ટાફની પણ નિમણૂક જરૂરી છે તેના માટે 8 હોદ્દા માટે 262 જગ્યા માટે 3 થી 6 માસના ફિક્સ વેતનથી ભરતીપ્રક્રિયા શરૂ કરવામાં આવી છે.