કેદીઓના બાળકોને શિક્ષણ ન આપવાના મામલે હાઈકોર્ટે ઉધડો લેતાં સરકાર જાગી

મઝહર પઠાણ > અમદાવાદ mazhar.pathan@timesgroup.com

રાજ્યની જેલોના કેદીઓના બાળકોના શિક્ષણની જવાબદારી રાજ્ય સરકારની હોવા છતાં સરકાર કેદીઓના બાળકોને શૈક્ષણિક સવલતો પૂરી પાડવામાં નિષ્ફળ રહેતી હોવાથી હાઈકોર્ટ દ્વારા શિક્ષણ વિભાગનો ઉધડો લેવામાં આવ્યો હતો. જેના પગલે શિક્ષણ વિભાગે તમામ જિલ્લા પ્રાથમિક શિક્ષણાધિકારીને પરિપત્ર મોકલી તેમના વિસ્તારમાં જે કેદીઓના બાળકો ભણતા હોય તેમને શૈક્ષણિક સુવિધા પૂરી પાડવા અને તેનું સતત મોનિટરિંગ કરવા આદેશ આપ્યો છે.

એટલું જ નહીં, આ પરિપત્રનો ભંગ કરનારા અધિકારી સામે ખાતાકીય પગલા લેવાની ચિમકી પણ ઉચ્ચારવામાં આવી છે. આ માટે અમદાવાદ મધ્યસ્થ જેલ દ્વારા રાજ્યની તમામ જેલના કેદીઓની વિગતો શિક્ષણ વિભાગને મોકલી આપતા તેમણે દરેક જિલ્લામાં કેદીઓના બાળકોને શૈક્ષણિક સુવિધા ઉપલબ્ધ કરાવવા માટેની તૈયારીઓ શરૂ કરી છે.

પ્રાપ્ત માહિતી અનુસાર, હાઈકોર્ટે આપેલા આદેશમાં રાજ્યની જુદીજુદી જેલોમાં સજા ભોગવતા કેદીઓના બાળકોને શૈક્ષણિક સવલતો આપવા માર્ગદર્શન અપાયું છે. આ સવલતો ઉપલબ્ધ કરાવવાની જવાબદારી રાજ્ય સરકારની હોવાનું પણ હાઈકોર્ટે જણાવ્યુ હતું. જેના પગલે રાજ્યની પ્રાથમિક શિક્ષણ નિયામકની કચેરી દ્વારા તમામ ડીપીઈઓ કચેરીમાં પરિપત્ર કરી જેલમાં સજા ભોગવતા કેદીઓના બાળકોને શૈક્ષણિક સવલતો જેવી કે, સ્કૂલ એડમિશન, શૈક્ષણિક ફી, સ્કોલરશીપ, યુનિફોર્મ, પાઠ્યપુસ્તકો, નોટબુકો તથા સરકારની જુદીજુદી યોજનાઓના લાભ મળી રહે તે માટે સૂચના આપવામાં આવી હતી.

મધ્યસ્થ જેલ દ્વારા તમામ જિલ્લાના કેદીઓની માહિતી પુરી પાડવામાં આવતી હોવા છતાં પ્રાથમિક સ્કૂલોમાં અભ્યાસ કરતા કેદીઓના બાળકોની શૈક્ષણિક સવલતો પુરી પાડવામાં આવતી ન હોવાનું બહાર આવ્યું છે. હાઈકોર્ટના ઠપકાના પગલે પ્રાથમિક શિક્ષણ નિયામકે તમામ ડીપીઈઓને પરિપત્ર મોકલી જેલના કેદીઓના બાળકોને શૈક્ષણિક સવલતો માટે આદેશ કર્યો હતો.