ધો-10નું પરિણામ 66.97%, સુરતનું પરિણામ ટોપ પર, અમદાવાદ ચોથા નંબરે

I am Gujarat

ધોરણ-10નું પરિણામ જાહેર

અમદાવાદઃ ગુજરાત માધ્યમિક અને ઉચ્ચતર માધ્યમિક શિક્ષણ બોર્ડનું વિજ્ઞાન પ્રવાહ બાદ ધોરણ-10નું પરિણામ જાહેર કરવામાં આવ્યું છે. ગઈકાલે બોર્ડ દ્વારા જાહેરાત કરાયા બાદ વિદ્યાર્થીઓ પરિણામની આતુરતાથી રાહ જોઈ રહ્યા હતો. બોર્ડની વેબસાઈટ http://gseb.org/ પરિણામ જાહેર કરી દેવામાં આવ્યું છે. આ વર્ષનું કુલ પરિણામ 66.96% રહ્યું છે જે ગયા વર્ષની સરખામણીમાં 0.53% ઓછું આવ્યું છે. આ વખતના પરિણામમાં પણ વિદ્યાર્થીનીઓએ બાજી મારી છે.હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

વિદ્યાર્થીઓની સંખ્યામાં વધારો

આ વર્ષે કુલ 8,22,823 વિદ્યાર્થીઓ પરીક્ષા આપવા માટે બેઠા હતા જે સંખ્યા પાછલા વર્ષે 7,90,240 હતી. આ વર્ષના પરિણામમાં ગીર સોમનાથ જિલ્લાનું સુપાસી સૌથી સારું પરિણામ ધરાવતું કેન્દ્ર રહ્યું છે. જ્યારે નબળું કેન્દ્ર પણ ગીર સોમનાથ જિલ્લાનું તડ રહ્યું છે. આ વખતે પણ અમદાવાદ (સીટી)નું પરિણામ અન્ય જિલ્લાની સરખામણીમાં નબળું રહ્યું છે. અમદાવાદનો નંબર સુરત, મોરબી અને રાજકોટ પછી આવે છે.

ગીર સોમનાથના બે સ્વરુપ

સારું પરિણામ ધરાવતું કેન્દ્ર સુપાસી છે જેનું પરિણામ 95.56% રહ્યું છે જ્યારે ઓછું પરિણામ ધરાવતું કેન્દ્ર તડ છે જેનું પરિણામ 17.63% છે. પાછલા વર્ષે સારું પરિણામ ધરાવતું કેન્દ્ર જૂનાગઢનું ખોરાસા (96.93%) હતું જ્યારે સૌથી નબળું કેન્દ્ર દાહોદનું સુખસર (5.93%) હતું. આ વખતે પણ માર્ચ 2018ની જેમ સુરત 79.63% સાથે સૌથી સારું પરિણામ ધરાવતો જિલ્લો બન્યો છે જે પાછલા વર્ષે 80.06% હતું. જ્યારે નબળો જિલ્લો આ વખતે 46.38% ટકા સાથે છોટા ઉદેપુર છે. પાછલા વર્ષે દાહોદનું પરિણામ સૌથી નબળું 37.35% રહ્યું હતું.

કેટલી શાળાઓએ મેળવ્યું 100% પરિણામ

આ વર્ષે 100% પરિણામ ધરાવતી શાળાઓની સંખ્યા 366 છે જે પાછલા વર્ષે 368 હતી. જ્યારે 30% કરતા ઓછું પરિણામ ધરાવતી શાળાઓની સંખ્યામાં ઘટાડો થયો છે જે પાછલા વર્ષે 1012 હતી જ્યારે આ વર્ષે 995 છે. 0% પરિણામ ધરાવતી શાળાઓની સંખ્યા પણ અડધી થઈ છે જે પાછલા વર્ષે 127 હતી જ્યારે આ વર્ષે 63 છે.

આ વખતે પણ વિદ્યાર્થીનીઓએ બાજી મારી

આ વર્ષે પણ વિદ્યાર્થિનીઓએ બાજી મારી છે. પાસ થનારી વિદ્યાર્થીઓના પરિણામની ટકાવારી 72.64% છે જ્યારે વિદ્યાર્થીઓની ટકાવારી 62.83 છે જે પાછલા વર્ષે 63.73% હતી. ગુજરાતી કરતા અંગ્રેજી માધ્યમના વિદ્યાર્થીઓનું પરિણામ સારું રહ્યું છે. ગુજરાતી માધ્યમનું પરિણામ 64.58% છે જ્યારે અંગ્રેજી માધ્યમના વિદ્યાર્થીઓનું પરિણામ 88.11% છે.

સુરત આગળ, અમદાવાદ-ગાંધીનગર પાછળ

આ વર્ષે ગેરરીતિના કુલ 119 કેસ નોંધાયા છે. જ્યારે CCTV કેમેરા ફુટેડના અનુસંધાનમાં નોંધાયેલા ગેરરીતિના કેસ 2165 છે જે પાછલા વર્ષે 1231 હતા. આ વર્ષે 1659 વિદ્યાર્થીઓના પરિણામ અમુક કારણોસર અનામત રખાયેલા છે. જિલ્લાવાર પરિણામમાં સુરત 79.63% સાથે ટોપ પર રહ્યું છે જ્યારે મોરબી 74.09% સાથે દ્વિતિય ક્રમ પર અને રાજકોટ 73.92 ટકા ત્રીજા ક્રમ પર રહ્યું છે આ પછી અમદાવાદ (સીટી) 72.45 ટકા સાથે ચોથા ક્રમ પર આવે છે, અને 71.98% સાથે ગાંધીનગર પાંચમા ક્રમે છે. નબળા પરિણામ ધરાવતા જિલ્લાઓમાં અંતિમ પાંચમાં છોટા ઉદેપુર, દાહોદ, પંચમહાલ, મહિસાગર અને ખેડાનો સમાવેશ થાય છે.

શાળાઓ પર કરાશે માર્કશીટનું વિતરણ

વિદ્યાર્થીઓને સવારે 11 થી 4 વાગ્યા સુધી શાળામાં માર્કશીટનું વિતરણ કરવામાં આવશે. બોર્ડે અખબારી યાદીમાં જણાવ્યું હતું કે, ધોરણ-10 અને સંસ્કૃત પ્રથમાના માર્ચ-2019ના ઉમેદવારોની માર્કશીટનું વિતરણ જિલ્લા કક્ષાએ નિયત કરેલા વિતરણ સ્થળો પર કરવામાં આવશે. તારીખ 21 મે 2019ને મંગળવારના રોજ સવારે 11:00 કલાકથી 16:00 કલાક દરમિયાન તેનું વિતરણ કરાશે. રાજ્યની તમામ માધ્યમિક શાળાઓના આચાર્યએ પોતાની શાળાનું પરિણામ જવાબદાર કર્મચારીને મુખત્યાર પત્ર સાથે મોકલી મેળવી લેવાનું રહેશે.