GTU સ્ટાર્ટઅપ માટે મેસીવ ઓનલાઇન કોર્સ શરૂ કરશે

નવગુજરાત સમય > અમદાવાદ

– ગુજરાત ટેકનોલોજિકલ યુનિવર્સિટી (જીટીયુ) દ્વારા સ્ટાર્ટઅપને લગતો નવો કોર્સ શરૂ કરવાનું નક્કી કરાયું છે. મેસીવ ઓપન ઓનલાઇન કોર્સ (મૂક)ના માધ્યમથી સ્ટાર્ટઅપ કરવા ઇચ્છતાં વિદ્યાર્થીઓને સહાયતા મળે તેવી વ્યવસ્થા કરવામાં આવી છે. પહેલી વખત યુનિવર્સિટી દ્વારા આ પ્રકારનો ઓપન કોર્સ શરૂ કરવામાં આવી રહ્યો છે. આગામી દિવસોમાં આ કોર્સ શરૂ કરવાની સત્તાવાર જાહેરાત પણ કરવાનું નક્કી કરાયું છે. યુનિવર્સિટીમાં અભ્યાસ કરતાં વિદ્યાર્થીઓ પૈકી જેઓ સેમેસ્ટર-૩માં છે તેઓે અભ્યાસ પૂર્ણ કર્યા બાદ પોતાનો ધંધો કરવા ઇચ્છતાં હોય તો તેમના માટે ખાસ સ્ટાર્ટઅપ પ્રોગ્રામો શરૂ કરવામાં આવ્યા છે. જેમાં વિદ્યાર્થીઓને પોતાનો બિઝનેસ શરૂ કરવા અંગેની તમામ માહિતી અને જાણકારી આપવામાં આવતી હોય છે. હાલમાં યુનિવર્સિટીમાં અભ્યાસ કરતાં અનેક વિદ્યાર્થીઓ સ્ટાર્ટઅપ પ્રોગ્રામ સાથે જોડાયેલા છે. હવે આગામી દિવસમાં યુનિવર્સિટી દ્વારા સ્ટાર્ટઅપ અંગેનો ઓપન ઓનલાઇન કોર્સ શરૂ કરવાનું નક્કી કરાયું છે. સૂત્રો કહે છે સામાન્ય રીતે અભ્યાસની સાથે જુદી જુદી એક્ટિવિટી વિદ્યાર્થીઓએ કરવાની હોય છે. જેના માટે ૧૦૦ પોઇન્ટ આપવામાં આવે છે. જેમાં વિદ્યાર્થીઓએ એનએસએસ, સેમિનાર, કવીઝ સહિતની જુદી જુદી પ્રવૃત્તિઓ કરવાની હોય છે. જો કોઇ વિદ્યાર્થી હવે સ્ટાર્ટઅપનો ઓનલાઇન કોર્સ કરે તેને ૯ પોઇન્ટ આપવાનું પણ નક્કી કરાયું છે. આ કોર્સમાં વિદ્યાર્થીઓ ઓનલાઇન પ્રવેશ લઇ શકશે. જેમાં વિદ્યાર્થીઓને સ્ટાર્ટઅપ અંગેની તમામ માહિતી ઓનલાઇન પુરી પાડવામાં આવશે. આ અંગેની સત્તાવાર જાહેરાત પણ આગામી દિવસોમાં કરવામાં આવશે.