નિશા ગોંડલિયા પર 2019માં થયેલા ફાયરિંગ મામલે ઝડપાયેલા બે શખ્સોએ કર્યો મોટો ધડાકો

અમદાવાદ: સમગ્ર ગુજરાતમાં ચર્ચાસ્પદ બનેલા બિટકોઈન કાંડના મુખ્ય આરોપી શૈલેષ ભટ્ટની સાળી નિશા ગોંડલિયા પર 2019માં થયેલા ફાયરિંગ મામલે મોટો ધડાકો થયો છે. ગુજરાત એટીએસે આ મામલામાં સડોવાયેલા બે આરોપીઓની પિસ્તોલ સાથે આજે ઉજાલા સર્કલ પાસેથી ઝડપી લીધા હતા. જેમની પૂછપરછમાં જાણવા મળ્યું હતું કે, નિશા ગોંડલિયાએ પોતે જ પોતાના પર ફાયરિંગ કરાવ્યું હતું. આ તરકટમાં તેણે એક બિલ્ડરની પણ મદદ લીધી હતી.

પોલીસના હાથે ઝડપાયેલા અયુબ દરજાદા અને મુકેશ સિંધી નામના બે આરોપીઓએ નિશાએ જ ફાયરિંગ કરાવ્યું હોવાનું પોલીસને જણાવ્યું હતું. એવું પણ જાણવા મળી રહ્યું છે કે, ભૂમાફિયા જયેશ પટેલ અને અન્ય એક બિલ્ડર સાથે નિશાને રુપિયાની લેવડ-દેવડ મામલે કોઈ માથાકૂટ થઈ હતી, અને તેને લઈને નિશાએ બંને વિરુદ્ધ ફરિયાદ કરાવવા માટે બીજા એક બિલ્ડર પર પ્રેશર કર્યું હતું, અને તેના ભાગરુપે જ નિશા પર ફાયરિંગ કરાવવાનો પ્લાન બનાવાયો હતો.

નિશા ગોંડલિયા પર નવેમ્બર 2019માં ખંભાળિયા નજીક ફાયરિંગ કરવામાં આવ્યું હતું. જોકે, તેમાં નિશાને કોઈ ઈજા નહોતી પહોંચી. તેણે આ મામલે દાખલ કરાવેલી પોલીસ ફરિયાદમાં જણાવ્યું હતું કે તે ખંભાળિયાથી દસ કિમી દૂર હતી ત્યારે એક કારમાં આવેલા શખ્સોએ તેના પર ફાયરિંગ કર્યું હતું. આ ફાયરિંગ જામનગરના વકીલ કિરિટ જોષી મર્ડર કેસના મુખ્ય આરોપી જયેશ પટેલના ઈશારે કરાવાયું હોવાનો પણ નિશાએ દાવો કર્યો હતો. જયેશ પટેલને પોતે દુબઈમાં મળી ત્યારે તેણે ધાકધમકીથી તેના બિટકોઈન વોલેટમાંથી કરોડો રુપિયાના બિટકોઈન પડાવી લીધા હોવાનું પણ નિશાએ તે સમયે પોલીસને જણાવ્યું હતું.

ઉલ્લેખનીય છે કે, જામનગરમાં ભૂમાફિયા જયેશ પટેલનો ત્રાસ વધતા થોડા સમય પહેલા જ અમદાવાદ ક્રાઈમ બ્રાંચના ડીસીપી દીપન ભદ્રનની જામનગર જિલ્લા એસપી તરીકે બદલી કરવામાં આવી હતી. ત્યારે પણ નિશા ગોંડલિયાએ એસપી ઓફિસ પહોંચીને આવેદન પત્ર આપ્યું હતું. નિશાએ જયેશ પટેલને કેટલાક રાજકારણીઓ પણ મદદ કરી રહ્યા હોવાના આક્ષેપ કર્યા હતા.