ગુજરાતના દર્દીઓમાં દેખાયા અમેરિકા, આફ્રિકામાં જોવા મળેલા કોરોનાના પ્રકાર

અમદવાદઃ ગુજરાતમાં જોવા મળતા કોરોના સેમ્પલનું એનાલિસિસ કરતા રાજ્ય સરકાર દ્વારા પોષિત ગુજરાત બાયોટેક્નોલોજી રિસર્ચ સેન્ટર(GBRC) જાહેર કર્યું કે રાજ્યમાં જે કોરોના વાયરસ વધુ જોવા મળે છે તે ઉત્તર અમેરિકા અને આફ્રિકામાં જોવા મળતા પ્રકારના કોરના વાયરસ છે. ગુજરાતમા એશિયામાં મળી આવતા કોરોના વાયરસનો પ્રકાર ઓછો જોવા મળે છે.

GBRC દ્વારા કરવામાં આવેલ બે સંશોધનમાં રાજ્યમાં વાયરસનો પ્રકાર, તેના ફેલાવની પેટર્ન અને વાયરસના જીન્સ પર અભ્યાસ કરવામાં આવ્યો હતો. દરેક સજીવના જીન્સમાં ન્યૂક્લિઓટાઇડ્સ(NT) નામના ખૂબ જ નાના કણ મળી આવે છે જેના દ્વારા વ્યક્તિના જીન્સ બને છે. સંશોધકોએ કહ્યું કે વાયરસના ન્યૂક્લિઓટાઇડ્સ(NT) અંગે જાણવાથી વાયરસની સંરચના અંગે ખબર પડે છે અને તેનાથી વેક્સીન કઈ રીતે તેનો નાશ કરી શકે તે શોધવામાં મદદ મળે છે.

ગુજરાતમાંથી એકઠા કરવામાં આવેલ સેમ્પલ પૈકી 93.45 ટકા સેમ્પલમાં NT C3037T અને A23403G મળી આવે છે. તેમજ NT C241T પણ ગુજરાતના 92.7% સેમ્પલમાં મળી આવે છે. જે પૈકી NT C3037T આફ્રિકાના 87.7% સેમ્પલમાં મળી આવે છે. જ્યારે ઉત્તર અમેરિકામાં 85.1% સેમ્પલમાં આ પ્રકારના વાયરસ સ્ટ્રેન મળી આવે છે.

આ પહેલાના અભ્યાસમાં પણ GBRCએ જણાવ્યું હતું કે ગુજરાતમાં કોરોનાના જીન્સ વૈવિધ્યસભર છે. સામાન્ય રીતે ભારતમાં એક જ પ્રકારના વાયરસ સ્ટ્રેન મળી આવે છે પરંતુ ગુજરાતમાં એક કરતા વધારે પ્રકારના વાયરસ સ્ટ્રેન મળી આવે છે.

આવું બનવા પાછળનું કારણ જણાવતા સંશોધકો કહે છે કે મહામારી શરું થઈ ત્યારે જુદા જુદા ખંડો અને દેશોમાંથી ગુજરાતમાં આવતા લોકો જુદા જુદા પ્રકારના કોરોના વાયરસના સ્ટ્રેન પોતાની સાથે લઈ આવ્યા હોઈ શકે છે. જેનાથી જે તે વિસ્તારમાં ફક્ત ખાસ પ્રકારના કોરોના વાયરસના જીન્સનું પ્રભુત્વ વધારે હોઈ શકે છે પરંતુ ગુજરાતમાં વિવિધ પ્રકારના કોરોના વાયરસ મળી આવી રહ્યા છે. વાયરસના જીન્સમાં આ ફેરફાર વાતાવરણ, વાયરલ લોડ, કેરિયરની ઉંમર, વાયરસથી સંક્રમિત થનાર વ્યક્તિની ઉંમર વગેરે આધારે નિશ્ચિત દેશમાં ખાસ પ્રકારના વાયરસ પોતાનું પ્રભુત્વ ધરાવે છે.