કાયદાનો ઉપયોગ કરીને ઓનલાઈન Rummy-જુગાર બંધ કરાવે રાજ્ય સરકાર: હાઈકોર્ટ

રાજ્યમાં ઓનલાઈન જુગારના મુદ્દે રાજ્ય સરકારને કાયદા હેઠળ યોગ્ય કાર્યવાહી કરીને તેને બંધ કરાવવાનો આદેશ હાઈકોર્ટના ચીફ જસ્ટિસ વિક્રમ નાથ અને જસ્ટિસ જે.બી. પારડીવાલાની ખંડપીઠે આપ્યો છે. ઓનલાઈન રમી અને ઓનલાઈન જુગારના મુદ્દે હાઈકોર્ટમાં થયેલી જાહેરહિતની અરજીનો ચુકાદો આપતાં હાઈકોર્ટની ખંડપીઠે નોંધ્યું, 'રાજ્ય સરકારે તાકીદે આ મામલે ધ્યાન આપવું જોઈએ અને શક્ય તેટલી ઝડપથી કાર્યવાહી કરવી જોઈએ. આ પ્રકારના જુગાર અથવા ગેમ મની લોન્ડ્રિંગ કે ફોરેન એક્સચેન્જના કાયદાનો ભંગ કરે છે કે કેમ તે દિશામાં પણ સરકારે તપાસ કરી કાર્યવાહી કરવી જોઈએ.' આ મુજબના આદેશ સાથે હાઈકોર્ટે જાહેરહિતની અરજીનો નિકાલ કર્યો છે.

ચુકાદો આપતાં હાઈકોર્ટે નોંધ્યું, 'ઓનલાઈન ગેમમાં જુગાર (ગેમ્બલિંગ) પણ સામેલ છે. જો આ જુગાર ગુજરાતમાં રમવામાં આવી રહ્યો હોય તો રાજ્ય સરકાર પાસેથી અપેક્ષા છે કે તેઓ આની સામે સખત કાર્યવાહી કરે કારણકે આ ગેમિંગ બંધારણ હેઠળ રાજ્ય સરકાર અંતર્ગત આવતો મુદ્દો છે. રાજ્યમાં જો કોઈ વેબસાઈટ ઓનલાઈન જુગાર રમાડતી હોય તો રાજ્ય સરકારે કાયદાકીય કાર્યવાહી કરવી જોઈએ. આ અંગેના ધારાધોરણો અથવા કોઈ નીતિ બનાવી હોય તો તે મુજબના પગલાં લેવા જોઈએ. આ ગેમ કે જુગાર મની લોન્ડ્રિંગ કે ફોરેન એક્સચેન્જના કાયદાનો ભંગ કરે છે કે કેમ તેની તપાસ થવી જોઈએ. અમે રાજ્ય સરકારને આદેશ આપીએ છીએ કે, અરજદારની અરજીને સરકાર સમક્ષની રજૂઆત ગણીને તેના મુદ્દાઓને ધ્યાને લઈને યોગ્ય કાનૂની કાર્યવાહી કરે.'

આ જાહેરહિતની અરજીમાં રાજ્ય સરકાર તરફથી એવી દલીલ કરાઈ હતી કે, રિટમાં ઉઠાવાયેલા મુદ્દાઓ અત્યંત મહત્વના છે અને સરકાર કાયદા મુજબ કાર્યવાહી કરશે. આ અરજીમાં જુગારની સાથે ઓનલાઈન રમી (Rummy)ને પણ ગેરકાયદેસર જાહેર કરવાની દાદ માગવામાં આવી હતી. રિટમાં ઉલ્લેખ હતો કે, 'ઓનલાઈન જુગાર કે ઓનલાઈન રમીની ગેમ ગુજરાત પ્રિવેન્શન ઓફ ગેમ્બલિંગ એક્ટ 1887ની ધારા 4-5ની જોગવાઈઓનું ઉલ્લંઘન કરે છે. તેથી ગુજરાત રાજ્યમાં ઓનલાઈન જુગાર અને ગેમિંગ ઉપર તાત્કાલિક પ્રતિબંધ મૂકવો જોઈએ. ઓનલાઈન જુગાર રમાડનારી વેબસાઈટ્સ અને મોબાઈલ એપ બિલાડીના ટોપની જેમ વધી રહી છે. અનેક ઓનલાઈન એપની તો જાહેરાત પણ આવે છે. અમુક કાયદાકીય ખામીના કારણે આવા ગેમ્બલિંગ પ્લેટફોર્મ ગેરકાયદેસરની પ્રવૃત્તિઓ પણ કરે છે.'

અરજીમાં આગળ ઉલ્લેખ છે, 'ભારતમાં ઓનલાઈન રમીની ઈન્ડસ્ટ્રી રૂ. 2200 કરોડ જેટલી હોવાનો અંદાજ છે. આ ગેમ કે જુગાર રમનારા તેના વ્યસની થઈ જાય છે અને તેની પાછળ પોતાના રૂપિયા અને સમય વેડફે છે.'