હડતાળ પર ઉતરેલા ઈન્ટર્ન ડોક્ટરોને રાજ્ય સરકારે આપી ચેતવણી

રાજ્યની સરકારી હોસ્પિટલના ઈન્ટર્ન ડોક્ટરો સ્ટાઈપેન્ડમાં વધારાની માંગ સાથે હડતાળ પર ઉતર્યા છે. છેલ્લા આઠ મહિનાથી ઈન્ટર્ન ડોક્ટરોને કોરોનાની ડ્યુટી સોંપવામાં આવી છે. તેમની માંગણી છે કે હાલમાં તેમને 12,800 રૂપિયા સ્ટાઈપેન્ડ મળે છે અને તેમાં વધારો કરીને તે 20,000 રૂપિયા કરવું જોઈએ. જોકે, રાજ્ય સરકારે હડતાળ પર ઉતરેલા ઈન્ટર્ન ડોક્ટરોને ચેતવણી આપી છે.

નાયબ મુખ્યમંત્રી નીતિન પટેલે સોમવારે જણાવ્યું હતું કે, તેઓ હળતાળ પાછી નહીં ખેંચે તો મંગળવારથી તેમની ગેરહાજરી નોંધાશે અને તેમને પીજીમાં એડમિશન મળશે નહીં. ઈન્ટર્નશિપ વગર ડોક્ટર થઈ શકાતું નથી. ઈન્ટર્ન ડોક્ટરોએ સરકારની મજબૂરીનો લાભ લેવાનો પ્રયાસ કરવો જોઈએ નહીં.

મોરબીમાં નવી મેડિકલ કોલેજને મંજૂરી મળી હોવાનું જણાવતા નીતિન પટેલે કહ્યું હતું કે, સરકાર દ્વારા કેન્દ્રને પત્ર લખીને મોરબીમાં કોલેજ શરૂ કરવા માટેની મંજૂરી માંગવામાં આવી હતી. હવે કેન્દ્ર સરકારે મંજૂરી આપતા ગુજરાતમાં મેડિકલ કોલેજની સંખ્યામાં વધારો થયો છે. વર્તમાન વર્ષથી જ મોરબીમાં 100 બેઠકો ધરાવતી નવી મેડિકલ કોલેજને મંજૂરી આપવામાં આવી છે.

સ્ટાઈપેન્ડ અંગે નાયબ મુખ્યમંત્રીએ કહ્યું હતું કે, આ સમગ્ર હડતાળ ગેરવ્યાજબી અને ગેરકાયદેસર છે. વર્તમાન પરિસ્થિતિને ધ્યાનમાં રાખીને ઈન્ટર્ન ડોક્ટરોએ સરકારની મજબૂરીને લાભ લેવો જોઈએ નહીં. જો આ હડતાળ જારી રહેશે તો સરકાર આકરા પગલાં ભરશે. ઈન્ટર્ન ડોક્ટરો હાજર નહીં રહે તો તેમની ગેરહાજરી ભરવામાં આવશે અને પીજીમાં એડમિશન મળશે નહીં.

આ ઉપરાંત તેમણે કહ્યું હતું કે, કોરોનાની પરિસ્થિતિ જોતા અમદાવાદમાં સિવિલ હોસ્પિટલમાં સાંજની ઓપીડી બંધ કરવામાં આવી હતી. જોકે, હવે કોરોનાની પરિસ્થિતિ નિયંત્રણ હેઠળ હોવાથી અમદાવાદ સિવિલમાં અને ટ્રોમા સેન્ટરમાં ઓપીડી શરૂ કરવામાં આવી છે. અમદાવાદમાં નાઈટ કર્ફ્યૂ અને અન્ય પગલાં સાથે ગુજરાતની પ્રજાના સહયોગથી કોરોના પર નિયંત્રણ મેળવવામાં સફળતા સાંપડી છે.