કોઈપણ વ્યક્તિની 'પાસા' હેઠળ અટકાયત કરતી વખતે સરકારે આ નિયમો પાળવા પડશે

અમદાવાદ: ગુજરાત સરકારે તાજેતરમાં જ પાસાના કાયદાને વધારે કડક બનાવ્યો છે. તેવામાં હાઈકોર્ટે આ કાયદા હેઠળ જે-તે વ્યક્તિની અટકાયત કરવા ઉપરાંત, જામીન અને અટકાયતી આદેશને પડકારવા સહિતના મુદ્દાઓ પર મહત્વના દિશા-નિર્દેશ આપ્યા છે. હાઈકોર્ટે સૌથી મહત્વનો આદેશ એ આપ્યો છે કે, કોઈપણ વ્યક્તિની પાસા હેઠળ અટકાયત થાય તેના પાંચ દિવસમાં તેને અટકાયતનો આદેશ, તેના કારણો અને દસ્તાવેજો આપવાના રહેશે.

હાઈકોર્ટના ચીફ જસ્ટિસ વિક્રમ નાથ અને જસ્ટિસ જે.બી. પારડીવાલાની ખંડપીઠે રાજકોટના એક અરજદારના કેસમાં ચુકાદો આપતા તેના અટકમાં લેવાના આદેશને રદબાતલ ઠેરવ્યો હતો. કોર્ટે સરકારને અટકાયતી આદેશોની પ્રક્રિયાને વ્યવસ્થિત કરવાનું જણાવતા કહ્યું હતું કે અટકાયત માટેના કારણો અલગથી દર્શાવવાના રહેશે, અને તે જે-તે વ્યક્તિ સમજી શકે તેવી ભાષામાં કરવાના રહેશે.

કોર્ટે એમ પણ જણાવ્યું હતું કે જે વ્યક્તિ પર પાસા કરાયો છે, તેને જામીન માટે તમામ સંજોગો ધ્યાનમાં લેવાના રહેશે. અટકાયતના આદેશના 21 દિવસમાં સરકારે પાસા બોર્ડ સમક્ષ તમામ વિગતો રજૂ કરવાની રહેશે. બોર્ડના રિપોર્ટ બાદ સરકારે નિર્ણય લેતી વખતે જે-તે વ્યક્તિને પણ સાંભળવો પડશે. જો બોર્ડ અટકાયતી આદેશને હટાવી લેવા જણાવે તો તેનું પાલન પણ કરવું પડશે. કોર્ટે એમ પણ ખાસ જણાવ્યું હતું કે પાસા માટે આપવામાં આવતા કારણો આંખમાં ધૂળ નાખવા જેવા ના હોવા જોઈએ.

ડિટેન્શનના આદેશ ધ્યાનથી જોવા ઉપરાંત તેના કારણોનું મૂલ્યાંકન થવું જરુરી છે તેવું પોતાના આદેશમાં કોર્ટે જણાવ્યું હતું. આવા ઓર્ડર સાથે રેકોર્ડ પર જે અન્ય મટિરિયલ હોય તેની પણ ચકાસણી થવી જરુરી છે. વ્યક્તિની સ્વતંત્રતા એ બંધારણે તેને આપેલો હક્ક છે, અને તેનો કોઈપણ રીતે ભંગ ના થવો જોઈએ તેવી પણ હાઈકોર્ટે તાકીદ કરી હતી.